Ekipa Ministériu Saúde evakua urjénsia família balun hosi Aldeia Onu-laran, suku Maudemu, postu administrativu Tiliomar, ne’ebé entre sira balun konfirmadu pozitivu COVID-19 hodi transporta ba sala izolamentu Vera Crus, Dili. Imajen TATOLI/Eugénio Pereira

DILI, 28 fevereiru 2021 (TATOLI)–Ministériu Saúde (MS) liuhosi Sala Situasaun Sentru Integradu Jestaun Krize (CIGC, sigla portugés) rejista tan ema na’in-rua pozitivu COVID-19, ne’ebé mai hosi postu administrativu Tiliomar, munisípiu Covalima no pasiente ida iha sala izolamentu Vera Crus rekuperadu, nune’e kazu ativu daudaun hamutuk 23.

Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste hosi Sala Situasaun CIGC, Rui Maria de Araújo, esplika hosi kontaktu besik ne’ebé halo ho Kazu Primáriu Klauhalek (KPK), estensionista, hanesan ema ida ne’ebé hela iha aldeia Onu-laran, suku Maudemu, postu administrativu Tiliomar, konfirmadu pozitivu.

“Kazu konfirmadu na’in-rua ne’e, hanesan família uma-laran hosi estensionista. Iha sira-nia uma laran iha ema na’in-sia, signifika hosi ema na’in-ualu seluk ne’ebé iha uma laran, na’in-rua de’it maka konfirmadu hetan kontájiu ho persentajen 25% (Household Secondary Attack Rate),” Koordenadór informa liuhosi konferénsia impresa iha Sentru Konvensaun Dili (CCD, sigla portugés), domingu ne’e.

Ekipa Ministériu Saúde evakua urjénsia família balun hosi Aldeia Onu-laran, suku Maudemu, postu administrativu Tiliomar, ne’ebé konfirmadu pozitivu COVID-19 hodi transporta ba Sala izolamentu Vera Crus, Dili. Imajen TATOLI/Eugênio Pereira

Nune’e, iha loron 27, ekipa vizilánsia buka tuir ema ne’ebé halo kontaktu besik ho estensionista ne’e no ekipa saúde rekolla amostra 90 iha fatin haat hanesan aldeia Klauhalek no aldeia Belulik Kra’ik, iha postu administrativu Fatumea no aldeia Onu-laran, suku Maudemu, postu administrativu Tiliomar, inklui Suai villa.

Amostra hirak ne’e seidauk halo análiza hotu, maibé hosi amostra 47 ne’ebé halo ona inklui análize laboratóriu, hatudu ema na’in-rua konfirmadu pozitivu.

Tuir Koordenadór Forsa-Tarefa, estensionista iha kolega serbisu na’in-27 mak besik no iha mós kontaktu besik ho ema na’in-12 iha família.

“Hosi rezultadu hatudu ema hirak ne’e negativu, maibé ekipa saúde sei monitoriza nafatin ema sira ne’e, iha izolamentu profilaktiku obrigatóriu ka auto-kuarentena iha ida-idak ninia uma,” nia akresenta.

Aleinde ne’e, MS mós kontinua hala’o teste no análize laboratóriu ba amostra sira ne’ebé horisehik (27/02) rekolla.

“Hakarak informa mós públiku tomak katak, hosi kazu konfirmadu foun ne’ebé ohin anúnsia, inklui mós estudante 5º Ano, iha Eskola Básika Sentrál, Salele, Tilomar. Ekipa saúde koordena ona ho autoridade relevante sira hodi buka tuir daudaun ona kolega turma uma ho estudante ne’e no mós kolega halimar estudante ne’e rasik,” nia hatutan.

CIGC apela ba públiku kolabora ho ekipa saúde

Koordenadór Forsa-Tarefa apela ba inan-aman estudante, no profesór sira iha Eskola Bázika Sentrál Salele atu kalma, labele pániku, no kolabora ho ekipa saúde, tanba bainhira iha estudante ida pozitivu, la signifika nia bele hada’et vírus ne’e ba ema hotu.

“Maski nune’e, presiza foti amostra hosi profesora iha turma, kolega turma no kolega halimar hamutuk estudante ne’ebé konfirmadu ona, hodi bele halo análize iha laboratóriu,” nia dehan.

Ekipa saúde sei foti mós amostra adisionál balun (random) hosi profesór no estudante balun, inklui mós iha fatin seluk iha Suai villa.

“Ba estudante no profesór sira seluk, bainhira iha karik sintoma hanesan sente isin manas, kakorok moras maka’as, mear ka inus-ben, favór kontakta ho Sentru Saúde ka bele telefone ba númeru 119, atu ekipa saúde organiza no halo atendimentu,” Doutór ne’e apela.

Prosesu rastreiu seletivu em massa ka screening ne’ebé hala’o iha munisípiu Covalima, Bobonaro no Rejiaun Administrativa Espesiál Oé-cusse Ambeno (RAEOA) sei nafatin la’o hela no amostra ne’ebé foti hosi loron 26 fevereiru to’o ohin nafatin hatudu rezultadu negativu.

“Ema tama hosi fronteira hosi loron 25 to’o ohin liu dalan regular hamutuk 17 no liu dalan ilegál ne’ebé autoridade sira deteta hamutuk na’in-11 maibé sira hotu agora tama ona iha kuarentena,” nia informa.

Iha biban ne’e MS no Sala Situasaun CIGC apela ba populasaun iha munisípiu Covalima tomak atu hakamtek iha ida-idak ninia fatin.

“Lalika la’o bá-mai lai, fó tempu atu ekipa saúde iha munisípiu Covalima, buka tuir kontaktu besik sira hotu no foti tan amostra hodi bele halo teste,” Koordenadór Forsa-Tarefa fó hanoin.

Aleinde ne’e, MS no CICG apela mós ba populasaun Timor-Leste iha tomak atu nafatin matan-moris neon nain, prátika nafatin medida uza maskára, fase liman beibeik ho sabaun ka dezinfetante no bainhira kumprimenta malu, la presiza ka’er liman, bensa-liman, rei-malu ka hakoak malu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here