Funsionáriu CLN halo limpeza armazen Tibar. Imajen/CLN

COVALIMA, 01 marsu 2021 (TATOLI) – Autoridade Munisípiu Covalima sei halo distribuisaun apoiu umanitária foos saka 400 ba abitante sira aldeia tolu iha Postu Administrativu Fatumean, Munisípiu Covalima.

Administradór Munisípiu Covalima Afonso Nuguera, informa foos saka 400 nu’udar apaiu umanitária hosi hosi Ministériu Solidariedade Sosiál no Inkluzaun (MSSI) sei rai iha Armazein Ministériu Solidariedade Sosiál (MSS) Covalima ne’ebé atu distribui  ba xefe família 300- resin.

Notísia Relevante : Serka sanitária, PDHJ rekomenda fó asisténsia umanitária ba povu

Nia dehan, tuir loloos foos ne’e fahe ona, maibé tanba hahú domingu to’o segunda (28/2-01/3), rai udan maka’as, tanba ne’e sira nia parte sei hein udan para maka buka transporte tula foos ba Fatumean.

Iha fatin hanesan, Administradór Postu Administrativu Fatumean, Filomeno Cardoso, dehan sira-nia parte sei fó apoiu direita ba abitante sira ne’ebé identifika mukit maka sei hetan apoiu.

“Foos saku 400 ne’e ba de’it aldeia tolu, Klauhalek, Fatumean no Mane Kiik ne’e sufisiente, maibé ba Fatumean tomak sei la to’o tanba ami iha xefe família 980,” tenik Filomeno Cardoso.

Aldeia Klauhalek, Suku Belulik Leten, enfrenta problema menus ai-han, hafoin Governu deside halo serka sanitaria ka lockdown totál, tanba deteta abitante na’in-hitu (7) no na’in haat (4) hosi Adeia Onu-Laran, Suku Maudemu, Postu Administrativu Tilimor  pozitivu COVID-19.

Tuir observasaun Agência Tatoli nian iha terrenu nota, populasaun iha Postu Fatululik, Fohorem, no Salele mós enfrenta menus ai-han tanba semana ida autoridade seguransa blokeia movimentu iha Covalima hodi evita transmisaun lokál peste letál COVID-19.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here