Traballadór sira hatun foos iha Portu Dili. Imajen Tatoli/António Gonçalves

DILI, 28 fevereiru 2021 (TATOLI)—Ministru Koordenadór Asuntu Ekonómiku, Joaquim Amaral, fó ona orientasaun ba Sentru Lojístika Nasionál (CLN, sigla portugés) atu halo distribuisaun foos ba munisípiu Bobonaro no Covalima.

Desizaun ne’e tanba iha loron 15 fevereiru, liuhosi reuniaun Konsellu Ministru deside halo serka sanitária iha munisípiu rua ne’e, hahú loron tuir mai hafoin desizaun ne’e sai (16/02) to’o 23:59 loron 03 marsu 2021.

“Ita fó ona instrusaun ba CLN hodi prepara foos atu halo distribuisaun. Ita-nia prioridade dahuluk ba munisípiu rua, hafoin kontinua fahe ba munisípiu sira seluk no halo intervensaun merkadu atu re-estabiliza fali folin sasán no foos iha munisípiu  rua inklui munisípiu sira seluk,” Ministru Joaquim informa foin lalais ne’e, iha salaun Canossa, Has-laran Dili.

Antes ne’e, abitante iha postu administrativu Fatumean, munisípiu Covalima hahú menus ai-han no folin sasán sa’e.

Notísia relevante: Povu Fatumean komesa enfrenta menus ai-han

Iha sorin seluk, MKAE mós simu karta hosi Administradór postu Fatumean, hodi orienta CLN prepara foos halo distribusaun no intervesaun iha merkadu.

“CLN halo ona preparasaun atu distribui foos ba munisípiu Covalima ho Bobonaro no halo intervensaun iha merkadu. CLN halo ida-ne’e tanba daudaun folin foos komesa sa’e iha postu administrativu Fatumean tanba kauza Governu aplika serka sanitária,” nia akresenta.

Governante ne’e dehan, sentru nasionál distribui foos bazeia ba númeru abitante, tanba la’ós distribui de’it ba munisípiu rua ne’e maibé distribui mós ba munisípiu seluk, tanba CLN iha ona mapa, kada tinan sempre halo intervensaun iha merkadu.

“CLN sei haree hela mekanizmu atu distribui tuir númeru abitante, sira iha ona mapa postu administrativu sira-ne’ebé kada tinan iha períodu hetan difikuldade ai-han no folin sa’e,” nia hatutan.

Foos ne’ebé iha armazen nasionál sufisiente tanba iha jullu 2020 Governu importa tonelada 30.000 resin hosi Vietname, ne’ebé la inklui foos importadu hosi setór privadu.

Minisípiu Covalima, kompostu hosi postu administrativu Fatululik, Fatumean, Fohorem, Maucatar, Suai, Tiliomar no Zumalai, ho totál populasaun 65.301 hosi uma-kain 12.564 (sensus 2015).

Enkuantu, munisípiu Bobonaro, kompostu hosi postu administrativu Atabae, Balibo, Bobonaro, Cailaco, Lolotoe no Maliana, ho totál populasaun 97.762 hosi uma-kain 17.635 (sensus 2015)

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here