Ekipa médiku rekolla ona amostra screening COVID-19 ba abitante na’in-93 ne’ebé halo kontaktu ho pasiente COVID-19 na’in-hitu (7) iha Aldeia Klauhalek, Suku Belulik Leten, Postu Administrativu Fatumean, Munisípiu Covalima. Imajen Tatoli/ Eugénio Pereira

DILI, 27 fevereiru 2021 (TATOLI)- Pasiente COVID-19 na’in-rua ne’ebé ekipa vijilánsia epidemiolojia no laboratóriu saúde evakua hosi Aldeia Unularan, Suku Maudemo, Postu Administrativu Tilomar, Munisípiu Covalima, sesta (26/2), hatudu katak na’in-ida maka pozitivu COVID-19.

Abitante na’in-rua hosi Salele ne’e, ekipa sira foti tanba halo kontaktu ho pasiente pozitivu COVID-19 tanba ne’e tenke submete ba kuarentena hodi halo prevensaun.

Notísia Relevante : Ekipa MS foti tan abitante na’in-rua iha Salele

Koordenadór Forsa Tarefa Prevensaun Metigasaun Surtu COVID-19, Rui Maria de Araújo. Imajen/Egas Cristovão

Koordenadór Forsa Tarefa Prevensaun Metigasaun Surtu COVID-19, Rui Maria de Araújo, liuhosi konferénsia imprensa, sábadu ne’e, iha Sentru Konvensaun Dili (CCD), hateten iha loron 25 ho loron 26 fevereiru 2021, ekipa konjunta vijilánsia epidemiolojia no laboratóriu, kontinua halo rastreiu iha Aldeia Klauhalek, Suku Belulik leten, Postu Administrativu Fatumean, Munisípiu Covalima, no rekolla tan amostra hosi ema ne’ebé kontaktu-besik ho kazu primeiru ema na’in-hitu iha Fatumean.

“Ekipa halo mós kontaktu ho ninia belun balun iha Tilomar no hafoin buka tuir, ekipa hetan duni sira no bainhira halo análize ba sira-nia amostra iha laboratóriu, hetan rezultadu pozitivu na’in-ida,” Rui Maria de Araújo  hateten.

Nia dehan kazu konfirmadu foun ida ne’e, mane, tinan 42, servisu nu’udar estensionista, agrikultura ninian hela iha Aldeia Onu-laran, Suku Maudemu, Postu Administrativu Tilomar, halo kontaktu ho kazu primeiru loron 11 ho loron 13 fevereiru 2021.

”Kazu konfirmadu foun ne’e informa katak nia seidauk halo viajen sai hosi Covalima, maibé iha kontestu hala’o ninia kna’ar nu’udar estensionista, nia halo kontaktu ho kolega servisu, ho mós superior ierárkiku iha servisu munisipál agrikultura, Covalima, inklui mós ho populasaun balun iha Tilomar no Fatumean,” Rui Araújo hateten.

Kazu foun ida-ne’e, hamosu indikasaun katak transmisaun lokál iha agrupamentu/cluster nakda’et tutan ka espalla ona to’o Aldeia Onu-laran, Suku Maudemu, Tilomar, no iha mós posibilidade nakda’et ka espalla ona iha Suai Vila, ho fatin seluk tan iha Covalima nia-laran.

”Ekipa konjunta husi vijilánsia epidemiolojia nivel nasionál, laboratóriu nasionál saúde, Servisu Munisipál Saúde hamutuk ho autoridade administrativa Covalima, ne’ebé integra iha Unidade Territoriál CIGC-SS, Munisípiu Covalima nian, oras ne’e hatún ekipa hodi buka-tuir ona ema hotu ne’ebé halo kontaktu-besik ho kazu foun ida-ne’e,” nia informa.

Sentru Integradu Jestaun Krize apela ba populasaun iha Salele, Suai Vila no Covalima nia-laran tomak, atu labele pániku no tuur hakmatek iha ida-idak nia fatin, lalika la’o ba-mai lai hodi fó tempu atu ekipa saúde ho ekipa konjunta Unidade Territoriál CIGC-SS, Munisípiu Covalima, buka tuir  kontaktu sira hotu, no foti tan amostra hodi bele halo teste.

Kazu pozitivu COVID-19 ne’ebé mak baixa iha sala izolamentu Vera Krús, Dili, hamutuk 22.

Jornalista   : Felicidade Ximenes

Editór        : Francisco Simões

HAKEREK NO HATÁN

Please enter your comment!
Please enter your name here