COVALIMA, 26 fevereiru 2021 (TATOLI) – Ekipa vijilánsia epidemiolojia ho laboratóriu Ministériu Saúde, sesta ne’e, evakua abitante na’in-rua hosi Salele ba konfinamentu obrigatóriu tanba halo kontaktu ho pasiente pozitivu COVID-19 hosi Aldeia Klauhalek, Suku Belulik Leten, Postu Administrativu Fatumean, Munisípiu Covalima.
Abitante na’in rua ho inisiál YDV, tinan 44, ho MCA, tinan 42, hosi Salele, Aldeia Unularan, Suku Maudemo, Postu Administrativu Tilomar, Covalima, halo kontaktu ho pasiente pozitivu COVID-19 tanba ne’e tenke submete ba kuarentena hodi halo prevensaun.
Medikál Sientista António Sales, agradese ba abitante na’in-rua ne’e tanba koopera ho ekipa médiku hodi foti amostra swab, no voluntáriu hakarak hela iha kuarentena hodi médiku avalia sira-nia kondisaun saúde hodi halo prevensaun ba propagasaun peste letál COVID-19 ba abitante sira seluk.
Notísia Relevante : Jornalista ho motorista submete ba screening COVID-19
Ekipa laboratóriu sei analiza sira-nia amostra swab ne’ebé halo para identifika karik iha transmisaun bele halo prevensaun urjénsia.
Hafoin transporta pasiente pozitivu COVID-19 na’in-hitu hosi Fatumean ba Sentru Izolamentu Dili, to’o ohin, ekipa rekolla ona amostra abitante sira ne’ebé halo kontaktu ho pasiente COVID-19 hamutuk ema na’in-93.
Tuir observasaun Agência Tatoli iha terrenu nota, maski ohin rai udan maka’as iha área Salele nian, maibé ekipa vijilánsia kontinua tama-sai komunidade nia uma rekolla amostra liuhosi screening.
Jornalista : Eugénio Pereira
Editór : Francisco Simões
