Konferénsia imprensa Ekipa Servisu-Covalima Vitória ho Domin-20 (EKSES-Covalima). Imajen/Espesiál

DILI, 27 fevereiru 2021 (TATOLI)- Ekipa Servisu-Covalima Vitória ho Domin-20 (EKSES-Covalima) preokupa  ho situasaun atuál iha Postu Administrativu Fatumean, Munisípiu Covalima, liuliu iha situasaun serka sanitaria ne’ebé hamosu impaktu sosiál oioin ba komunidade nia moris.

Bazeia Ba Rezolusaun Governu No.4/2021, 15 Fevreiru 2021, ne’ebé impoin ona serka sanitáriu ka lockdown iha munisípiu rua, hanesan Covalima ho Bobonaro, hodi bandu totalmente movimentu tama no sai iha munisípiu rua-ne’e.

Notísia Relevante : Na’in-rua ne’ebé evakua hosi Salele, ida pozitivu COVID-19

“Ami Covalima-oan sira ne’ebé hela iha Dili no deside hodi hamahon an iha Ekipa Servisu-Covalima Vitoria ho Domin-20 sente preokupa tebes-tebes ho situasaun atuál iha Postu Administrativu Fatumean, ne’ebé hatudu hela faktu sira hanesan ema infetadu sira sei abandonadu hela iha sira nia hela fatin hodi prejudika posibilidade transmisaun lokál iha Postu  Administrativu Fatumean no povu Fatumean  oras ne’e daudaun hahú enfrenta menus ai-han tanba laiha ona asesu ba merkadu,’’ Rosario Doloroso Ximenes, hateten liuhosi konferénsia imprensa iha Knua RENETIL, Farol, Dili, sábadu ne’e.

Nia dehan komunidade hahú susar atu asesu bee-moos, ai-han ho nutrisaun, mina no nesesidade bázika sira seluk tan  tanba iha impedimentu ba sira nia mobilidade iha área afetadu.

“Ezije ba Ministériu Saúde atu imediatamente halo lalais transferénsia ba ema sira ne’ebé mak afetadu ona hosi COVID-19 mai iha sentru izolamentu Vera Krús, Dili, atu nune’e, bele prevene no asegura komunidade Postu Administrativu Fatumean tomak ho Munisípiu Covalima,’’ Rosario Doloroso Ximenes hateten.

EKSES-Covalima ezije ba Ministériu Saúde atu hadi’a lalais jestaun servisu Sentru Integradu Jestaun Krize (CIGC) COVID-19 nian, hodi estabelese urjentemente sentru kuarentena no sentru izolamentu iha Munisípiu Covalima, liu-liu iha Postu Administrativu Fatumeam. Atu nune’e ekipa Servisu Saúde Munisípiu Covalima, bele iha kompeténsia própriu hodi ezerse sira nia funsaun ba halo atuasaun imediatu ba kazu sira ne’ebé mak mosu, nune’e la presiza tenke hein atuasaun hosi servisu saúde sentrál Ministériu Saúde nian.

Covalima oan sira ezije ba Ministériu Saúde atu halo lalais teste masál PCR no SWAB iha Covalima no husu ba Polísia Nasionál Timor-Leste (PNTL), Autoridade Lokál Munisípiu Covalima, Ministériu Koordenadór ba Asuntu Ekonómiku no AIFAESA, hodi kontrola no halo intervensaun ba presu sasán báziku iha merkadu sira iha Munisípiu Covalima, ne’ebé oras ne’e folin komesa sa’e.

Covalima oan sira  husu mós ba ministériu tutela atu fasilita emprezáriu lokál hodi halo restocking ba sasán báziku iha merkadu sira iha Munisípiu Covalima.

Husu ba Ministériu Asuntu Ekonomia atu tau konsiderasaun hodi responde ba pedidu ne’ebé hato’o hosi Autoridade Munisípiu Covalima, nune’e urjentemente CLN bele halo distribuisaun foos ba komunidade sira iha fatin afetadu COVID-19 liu-liu Postu Administrativu Fatumean.

Husu ba ministériu kompetente sira atu fornese apoiu subsídiu nesesáriu sira ba família vulneravel sira iha area afetadu COVID-19 no husu ba Ministériu Interiór atu fornese apoiu seguransa ba autoridade sira hodi halo kontrola másimu ba movimentu ilegál sira iha área afetadu COVID-19, hodi nune’e redús no hakotu poténsia transmisaun lokál ka metigasaun.

Parte sira ezije ba Governu atu aumenta kekursu seguransa PNTL ho F-FDTL iha pontu entrada sira  iha Munisípiu Covalima hodi haforsa postu vijilánsia no halo observasaun másimu ba ema no sasán ne’ebé mak deskonfia kontra bandu tama no sai ilegálmente.

Covalima oan husu ministériu kompetente sira atu konsidera no fó apoiu nesesáriu ba entidade Covalima oan sira ne’ebé mak voluntáriamente hakarak apoiu ba reforsa servisu prevensaun COVID-19, no mobiliza asaun umanitária ba komunidade sira iha área afetadu COVID-19.

Parte sira fiar katak Governu bele halo levantamentu hodi fó subsídiu ba negosiante sira ne’ebé afetadu hosi Estadu Emerjénsia, tanba sira labele halo movimentu negósiu ba munisípiu sira seluk, ezemplu hanesan motorista OJEK, motorista mikrolete no bus, atu nune’e sira bele hala’o moris  durante kumpre serku sanitaria.

‘’Bainhira  ezijénsia sira ne’ebé mensiona iha leten la hetan konsiderasaun urjentemente hosi órgaun kompetente sira, maka ami husu ba Governu atu hapara ona polítika serka sanitária (lockdown) iha Munisípiu Covalima,’’ Rosario Doloroso Ximenes afirma.

Jornalista  : Felicidade Ximenes

Editór        : Francisco Simões

HAKEREK NO HATÁN

Please enter your comment!
Please enter your name here