Xefe Suku Goulolo, Joao de Deus. Imajen/Mídia SEKoop

ERMERA, 26 fevereiru 2021 (TATOLI)—Uma-kain 110 iha suku Goulolo, postu administrativu Letefoho, munisípiu Ermera daudaun ne’e seidauk asesu eletrisidade.

 “Iha Goulolo, uma-kain 110 iha aldeia rua maka seidauk asesu ba eletrisidade,” Xefe Suku Goulolo, João de Deus, informa ba Agência TATOLI iha suku Goulolo, sesta ne’e.

Notísia relevante: EDTL,E.P finaliza ona dezeñu dada eletrisidade ba área 31

Antes ne’e, líder komunitáriu sira enkontru ona ho ministériu relevante, ne’ebé aseita ona hodi tinan ne’e rezolve komunidade Goulolo nian preukupasaun.

“Ami ba reuniaun ho Ministru Obras Públika hodi hato’o preokupasaun suku. Espera tinan ne’e bele hetan eletrisidade. Ha’u garante tinan ne’e Ministériu Obra Públika sei rezolve eletrisidade iha ami-nia suku, nune’e komunidade sira bele sente ukun-an,” nia espera.

Antes ne’e, Ministériu Obra Públika identifika ona iha suku hamutuk 77 iha territóriu tomak  maka seidauk asesu ba eletrisidade durante tinan barak nia laran, tanba ne’e ministériu tau ona ba planu prioridade iha tinan 2021 hodi implementa pakote balun iha faze dahuluk.

Hosi totál suku ne’ebé seidauk asesu ba eletrisidade, tuir planu sei finaliza 31 dezeñu no Bill of Quantity (BoQ), atu implementa pakote ne’e uluk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here