Imajen/Media PR.

DILI, 26 fevereiru 2021 (TATOLI)—Tenente Jenerál, FALINTIL Forsa Defeza Timor-Leste (F-FDTL), Tito da Costa Cristovão ‘Lere Anan Timur’, hateten promosaun diviza ba jenerál no ofisiais ne’ebé sira hetan hosi Prezidente Repúblika, Francisco Guterres Lú Olo, ne’e ba interese nasionál la’ós ba grupu ruma.

Notísia Relevante: Prezidente Repúblika halo promosaun ba postu ofisiál jenerál-jenerais

“Ami-nia promosaun ne’e ba interese nasionál la’ós ba grupu. Iha mundu grupu barak mak uza militár hodi alkansa sira-nia objetivu. Intensaun ida-ne’e labele mosu iha Timor-Leste no sei la mosu,” Tenente Jenerál, Lere Anan Timur, hateten iha ámbitu serimónia promosaun diviza iha Palásiu Prezidensiál Nicolau Lobato, Bairru Píte, Dili, sesta ne’e.

Lere Anan Timur hateten, keta iha grupu balun mak hanoin ida-ne’e maibé keta konta ho sira na’in haat (4) ne’ebé ohin simu promosaun ne’e hodi monu ba monobra polítika no instabiliza ba rai no povu ida-ne’e.

Tuir nia, promosaun ida-ne’e katak halo reflesaun no halo derrota no susesu, sala no di’ak mak bele servi di’ak liután nasaun no povu Timor-Leste ida-ne’e.

“Ohin ita iha pájina foun ba FALINTIL Forsa Defeza Timor-Leste (F-FDTL) no ba povu Timor-Leste, ne’ebé ita asiste dala ida-tan ba promosaun postu ba ami na’in-haat ne’ebé mak hetan. Ha’u ba Tenente Jenerál, Brigadeiru Falur Rate Laek ba Maijór Jenerál ho pozisaun nafatin, Xefe Estadu Maior Jenerál F-FDTL no Vise de Esatdu Maior Jenerál F-FDTL,” Lere Anan Timur hateten.

Nia dehan, iha mós promosaun na’in-rua ba Coronel Calisto Santos Coli ‘Coliati’ ba postu Brigadeiru Jenerál, Kapitaun Mar-e-Guerra Donanciano do Rosário da Costa Gomes ‘Pedro Klamar Fuik’ ba postu de Comodoro.

“Promosaun ne’ebé ami hetan iha instituisaun F-FDTL iha Timor-Leste tanba iha konfiansa Estdu nian ba ami, la’ós tanba ami-nia karreira militár mak hetan de’it susesu. Ami-nain rua kompaneiru Falur Rate Laek laiha kursu akadémia militár nian. Ha’u, promosaun espesiál ida-ne’e sai últimu ba ha’u-nia karreira militár distina hosi 1975 to’o ohin loron,” nia dehan.

Nia haktuir, nia sei soldadu FALINTIL dezde sei 1975 to’o ohin loron kuaze tinan 46 ona ne’ebé mak servi ba Estadu ida-ne’e, durante prekurusu naruk ne’e hanesan umanu klaru iha erru, nune’e mós iha susesu tanba ne’e mak Governu no Estadu iha konfiansa hodi promove ba Tenente Jenerál no Maijór Jenerál.

Nia dehan, la’ós tanba sira-nia formasaun militár hosi akadémia militár maibé nia dehan sira-nia lideransa komandu maihosi sira-nia esperiénsia rasik, mai hosi sakrifísiu no raan fakar hosi erói FALINTIL ba funu independénsia nasionál.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here