DILI, 26 fevereiru 2021 (TATOLI)—Ministériu Saúde (MS) distribui ona ambulánsia 11 ne’ebé oferese hosi Banku Mundiál, ba Munisípiu sanulu.
Munisípiu sanulu ne’ebé hetan ambulánsia hirak ne’e mak hanesan Baucau, Manufahi, Dili, Bobonaro, Lautém, Manatuto, Aileu, Liquiçá, Viqueque no Covalima mak hetan rua.
Notísia Relevante:Banku Mundiál oferese ambulánsia 11 ba MS
Ministra Saúde Odete Maria Freitas Belo, hateten Munisípiu ne’ebé seidauk hetan, hein apoiu tuir-mai hosi Governu Japaun.
“Ambulánsia hirak ne’e iha ona Diresaun Nasionál Ambulánsia atu jere, hodi haruka ba Munisípiu sira,” Odete Belo hateten ba jornalista-sira iha Palásiu Sinzas, Caicoli, sesta ne’e.
Iha fatin hanesan Diretór Jerál Serbisu Kooperativu Ministériu Saúde, Marcelo Amaral, informa Banku mundiál apoia ambulánsia 11 no karreta operasionál ualu ba Governu Timor-Leste, liu husi Ministériu Saúde liga ho Estadu emerjénsia iha ámbitu COVID-19.
“Orsamentu ne’ebé Banku Mundiál oferese ba ita hamutuk $942.857,” Marcelo Amaral hateten.
Kona-bá karreta operasionál ualu ne’ebé iha, rua distribui ona ba Minsitériu Finansa (MF) Aitarak Laran no neen iha hela Ministériu Saúde.
Jornalista: Felicidade Ximenes
Editór: Cipriano Colo
