Ambulánsia 11 no karreta operasionál ualu ne’ebé oferese hosi Banku Mundiál. Imajen Tatoli/Felicidade Ximenes.

DILI, 05 fevereiru 2021 (TATOLI)—Banku Mundiál oferese ambulánsia 11 no karreta operasionál ualu ba Governu Timor-Leste (TL) liu hosi Ministériu Saúde (MS).

“Ambulánsia 11 ho karreta operasionál ualu hamutuk 19 ne’e Banku Mundiál oferese mai ita  ligadu ho Estadu emerjénsia iha situasaun COVID-19,’’ Diretór Jerál Serbisu Kooperativu, Ministériu Saúde, Marcelo Amaral hateten ba jornalista Agência Tatoli iha serbisu fatin Caicoli, sesta (05/02).

Notísia Relevante:Banku Mundial Kontinua Apoiu Dezenvolvimentu TL

Tuir planu, Ministériu Saúde sei distribui ambulánsia haat ba munisípiu sira iha área fronteira hanesan Bobonaro no Covalima.

Alende ne’e, ambulánsia haat seluk sei distribui ba Sentru Saúde sira iha área remota hanesan Ermera, Lautém no Baucau.

“Antes ne’e ita oferese ona karreta multifunsaun ba munisípiu Baucau atu kobre iha área rurál hanesan Baguia, maibé bainhira iha nesesidade ita sei fó tan,” Marcelo Amaral subliña.

Kona-ba karreta operasionál ualu ne’ebé iha, Ministériu Saúde sei distribui rua ba Minsitériu Finansa (MF) Ai-tarak Laran no neen Ministériu Saúde rasik mak sei uza, tuir planu sei distribui iha tempu badak.

Orsamentu ne’ebé Banku Mundiál prevee hodi sosa ambulánsia 11 no karreta operasionál ualu ne’e hamutuk $942.857.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here