ERMERA, 26 fevereiru 2021 (TATOLI)-–Xefe Suku Goulolo, João de Deus, triste tanba kondisaun estrada ligasaun suku Goulolo, postu administrativu Letefoho, munisípiu Ermera bá kapitál Ermera kontinua a’at to’o agora.
“Ha’u triste tebes haree estrada iha suku Goulolo liga bá kapitál Ermera, ita-boot haree rasik. Suku Goulolo ne’ebé lokaliza iha parte villa Letefoho maka nia estrada hanesan ne’e ona, oinsá iha área rurál liu,” Líder komunitáriu ne’e dehan ba Agência TATOLI, iha suku Goulolo, sesta ne’e.
Notísia relevante: Tinan ne’e, MOP reabilita estrada rurál kilómetru 291 iha territóriu
Nia haktuir, desde uluk kedan nia parte hato’o proposta ba nível munisipál no Ministériu Obra Públika maibé tanba razaun orsamentu temporária maka parte ministériu la konsege rezolve.
Maski nune’e, Xefe suku otimista tinan ne’e Governu sei rezolve kondisaun estrada Goulolo bá Ermera.
“Foin daudun Ministériu Obra Públika haruka ona karreta pezadu mai, tanba ne’e ha’u fiar tinan ne’e Governu sei hadi’a ami-nia estrada,” nia akresenta.
Tinan ne’e, Governu sei reabilita estrada rurál hamutuk kilómetru 291 no iha fundu infraestutura mós aloka ona osan hodi reabilita estrada munisípál kilómetru 380, estrada urbanu kilómetru 149 no estrada nasionál kilómetru 49.
Iha tinan ne’e, orsamentu ba Ministériu Obra Públika hamutuk $240.673.539, ne’ebé foku ba dezenvolvimentu, konstrusaun, reabilitasaun, manutensaun no jestaun estrada, ponte no kontrolu Cheia ho montante $25.159.778, ne’ebé ekivalente 10,5% husi totál Orsamentu Jerál Estadu 2021.
Jornalista: Natalino Costa
Editora: Julia Chatarina
