Ekipa médiku halo screening COVID-19 ba jornalista RTTL, Jully Centro hodi prevene surtu COVID-19. Imajen Tatoli/ Eugénio Pereira

COVALIMA, 26 fevereiru 2021 (TATOLI)- Ekipa vijilánsia epidemiolojia, ho laboratóriu no ekipa jornalista na’in-tolu no motorista sira ne’ebé durante ne’e hala’o servisu iha Munisípiu Covalima, sesta ne’e, submete ba screening COVID-19.

Medikál Sientista, António Sales, esplika ekipa ema na’in-19 kompostu hosi enfermeiru, epidemiolojia, laboratóriu, jornalista Agência Tatoli, RTTL,E.P  no motorista sira tenke kumpre screening masál  hodi halo kontrolu ba sira nia kondisaun saúde nu’udar medida prevensaun COVID-19.

Notísia Relevante : COVID-19 iha Fatumean, komunidade la onestu fó informasaun

Jornalista RTTL.EP, João Guterres, submete ba screening Covid-19 iha Covalima. Imajen Tatoli/Eugénio Pereira

Ekipa sira ne’e hala’o ona servisu durante loron 11 iha Covalima, hahú hosi loron 16 to’o  loron 26 fevereiru 2021, hodi halo kobertura ba atividade ekipa saúde nian halo screening masál iha liña fronteira terrestre Munisípiu Covalima.

Nia hatutan, screening ne’e nu’udar aktu prevensaun ba surtu COVID-19, tanba ekipa jornalista sira mós durante loron-11 akompaña médiku sira halo screening masál ba komunidade sira ne’ebé  iha pontu entrada Covalima.

Iha fatin hanesan, Jornalista RTTL.EP, João Guterres no Jully Centru, konsidera screening COVID-19 ne’e importante, hodi halo identifikasaun ba sira-nia saúde para bele prevene aan hosi peste letál COVID-19.

João dehan, atividade kobertura ne’ebé sira iha fatin risku durante ne’e hetan kontrolu másimu hosi ekipa médiku hodi fasilita sira uza mós ropa saúde prevensaun ba COVID-19 tuir padraun  Organizasaun Mundiál  Saúde (OMS).

Jornalista RTTL, Jully Centru nu’udar operadór kámara agradese ba ekipa vijilánsia saúde ba teste ne’e hodi identifika sira-nia kondisaun saúde durante halo kobertura iha fatin risku COVID-19 iha liña fronteira Covalima

Iha parte seluk, Médiku Jerál, Dionísio Amaral mós agradese, tanba teste ne’e importante hodi kontrolu mós sira-nia saúde, tanba durante ne’e rasik mak halo teste ba abitante na’in-hitu ne’ebé pozitivu COVID-19.

Ekipa vijilánsia, laboratóriu no jornalista durante halo atividade kontinua utiliza ekipamentu protesaun pesoál hanesan bata, face shield, máskara, luvas, xapeu, sapatu no ókulu bainhira akompaña servisu rekolla amostra ba abitante sira iha zona risku COVID-19.

Daudaun ne’e ekipa Ministériu Saúde no Sala Situasaun Sentru Integradu Jestaun Krize (SS-CIGC) kontinua destaka iha Covalima hodi halo identifikasaun ba abitante sira ne’ebé halo kontaktu direita hodi pasiente COVID-19 na’in-hitu iha Postu Administrativu Fatumean, Munisípiu Covalima.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here