Ekipa Médiku transporte abitante na’in-neen ne’ebé pozitivu COVID-19 iha Aldeia Klauhalek, Suku Belulik Leten, Postu Administrativu Fatumean, Munisipiu Covalima ba Dili. Imajen Tatoli/Eugénio Pereira

DILI, 25 fevereiru 2021 (TATOLI)— Sala Situação Centro Integrado Gestão de Crises (SS-CIGC sígla portugés), anunsia kazu pozitivu COVID-19 foun ida tan hosi aldeia Klauhalek, Suku Belulik Leten, Postu Administrativu Fatumean, Munisipiu Covalima.  

Rezultadu ne’e fó-sai hosi Koordenadór Forsa-Tarefa ba Prevensaun no Mitigasaun Surtu COVID-19, Rui Maria de Araújo iha Centro Convenções Dili (CCD).

Notísia Relevante:Pasiente pozitivu COVID-19 iha Fatumean aumenta tan rua

“Horisehik, 24 Fevereiru 2021, ekipa vizilánsia epidemiolójika no laboratóriu, halo rastreiu iha aldeia Klauhalek, rekolla tan amostra 40 ba halo teste laboratóriu. Hosi teste PCR ne’ebé halo, hetan tan pozitivu ida, mane, ninia kaben konfirmadu nu’udár kazu foun, loron rua liu-bá,” Rui Maria de Araújo ko’alia ba jornalista-sira liu hosi konferénsia imprensa.

Hosi dadus ne’ebé rekolla no análiza ne’ebé halo ba istória kontaktu hosi kazu foun ida-ne’e, ekipa vizilánsia to’o iha konkluzaun katak kazu foun ida ohin, mane ho idade tinan 69, hela iha aldeia Klauhalek, sintomátiku, nia gasta maiór parte hosi nia-tempu iha to’os no haki’ak karau fatin, besik baliza ho Indonézia-nia desa ida naran Lookeu, Kecamatan Tasifeto Barat, Kabupaten Belu.

“Ninia rezultadu PCR hatudu CT (Cycle threshold) value 40, signifika nia iha faze rekoperasaun. Ida-ne’e hatudu katak nia hetan kontájiu, entre semana rua to’o semana tolu liu-bá,” nia subliña.

Dadus hirak ne’e hotu hatudu katak, to’o ohin, kluster ka agrupamentu Klauhalek, parte SS-CIGC identifika ona kazu primáriu, ne’ebé hala’o transmisaun lokál ba ema na’in-neen, feto na’in-haat no mane na’in-rua.

Maski nune’e, Médiku ne’e hatutan, seidauk iha evidénsia katak kluster ka agrupamentu ida-ne’e espalla ona mós ba fatin seluk.

Ekipa vizilánsia epidemiolójika ho laboratóriu hosi nível nasionál, munisípiu Covalima no Sentru Saúde Fatumean, hamutuk ema na’in 20, oras ne’e daudaun hala’o nafatin  rastreiu ba kontaktu-sira hotu-hotu.

Dadus jerál ohin-nian,  Kazu konfirmadu foun  1,  Kazu rekoperadu 1 hosi Rejiaun Administrativa Espesiál Oe-cusse Ambeno (RAEOA), Kazu ativu  21, Ema tama hosi fronteira iha horisehik mai ohin  liu dalan regulár hamutuk 17, irregulár na’in-haat no sira hotu tama iha kuarentena.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here