DILI, 24 fevereiru 2021 (TATOLI)-Komandante Polísia Unidade Tránzitu Munisípiu Dili, Inspetór Domingos Sarmento Gama, informa, durante loron 13 to’o loron 19 fevereiru, tinan ne’e, polísia rejista asidente tráfegu 27 akontese iha área jurizdisaun Dili.
“Hosi total kazu asidente tráfegu ne’e rezulta vítima kanek todan na’in-neen, kanek kaman na’in-21, kazu fatal ka rezulta ema mate laiha,” Domingos Sarmento Gama, informa ba jornalista sira liuhosi konferénsia imprensa iha komandu PNTL Munisípiu, Dili, kuarta ne’e.
Notísia Relevante : Semana dahuluk, PNTL rejista asidente tráfegu 16 iha Dili
Nia dehan, hosi kazu asidente tráfegu ne’e iha kazu 14 mak família sira rezolve tuir família no 13 mak ninia prosesu ba ona Tribunál.
Ho asidente sira-ne’e, PNTL Munisípiu Dili husu ba sidadaun hotu bainhira kondús motor no karreta atu ho kuidadu no kumpre nafatin regra tránzitu ho sinais sira nune’e evita asidente sira ne’ebé la espera bele akontese.
Jornalista : Nelson de Sousa
Editór : Francisco Simões
