Asidente tráfegu entre karreta ida soke motór iha Ponte CPLP I, Comoro, Dili, rezulta karreta no motór, inklui fasilidade estrada públiku hetan estragus. Imajen/PNTL

DILI, 11 janeiru 2021 (TATOLI)–Iha semana dahuluk, hosi loron 01 to’o loron 10 janeiru 2021, Komandu Polísia Munisípiu Dili, rejista asidente tráfegu hamutuk 16 akontese iha kapitál Dili.

Asidente iha Hudi Laran, Dili. Imajen/PNTL

Alende kazu asidente tráfegu, PNTL Dili rejista mós insidente hamutuk 55, no iha kazu 38 maka konsidera krime no prosesa tuir lei ba Ministériu Públiku.

Insidente 55 ne’ebé akontese rekolla hosi Postu Polísia Eskuadra neen (6) hanesan, Kristu Rei, Don Aleixo, Nain Feton, Vera Krús, no Metinaro no Postu Atauro zero kazu no insidente.

Komandante Polísia Munisipiu Dili, Superintendente Xefe Henrique da Costa, dehan asidente tráfegu 16 ne’ebé akontese la rezulta ema ruma mate, maibé vítima sira maioria sofre kanek no trauma, tanba lori transporte ho kondisaun lanu.

“Asidente sira-ne’e la prejudika ema mate. Mézmu nune’e,   ema sira envolve iha asidente ne’e trauma,” informa Superintendente Xefe, Henrique da Costa, ba jornalista, ohin, iha Komandu PNTL, Dili.

Nia hatutan, asidente ne’ebé akontese entre karreta ida soke motór iha Ponte CPLP Comoro I rezulta karreta no motór inklui fasilidade estrada públiku hanesan besi protesaun ponte nian hetan estragus, maibé vítima sira iha kondisaun di’ak.

PNTL Dili rejista asidente hanesan akontese karreta privadu ida soke kamioneta ida nia kotuk iha área Hodi Laran, rezulta kondisaun karreta oin nia mákina hetan estragus maka’as.

Hosi asidente sira ne’ebé rejista, PNTL Dili kontinua alerta motorista hotu- hotu la’o kontrola aan, liu lori transporta labele konsumu alkóliku hodi evita asidente.

Iha Domingu kalan (10/01), PNTL Dili halo operasaun no apreensaun ba motorizada hamutuk 61 ne’ebé viola regra tránzitu nian, inklui rekolla mós osan infrasaun iha primeira semana hosi infratór sira hamutuk $13,690 maka hatama ba kofre Estadu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here