Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto. Imajen TATOLI/Osória Marques.

DILI, 23 fevereiru 2021 (TATOLI)—Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten iha tempu badak Governu sei aprezenta Planu Asaun Nasionál (PAN) ba Ema ho Defisiénsia (EhD) ba Konsellu Ministru hodi hetan apresiasaun.

Notísia Relevante: Iha TL sei akontese injustisa sosiál ba Ema ho Defisiénsia sira

“Ami-nia polítika mak agora kria Planu Asaun Nasionál hodi implementa iha prátika. Tanba ne’e, iha meadu marsu, parte MSSI sei lori Planu Asaun Nasionál Ema ho Defisiénsia hodi ba aprezenta iha Konsellu Ministru hodi hetan apresiasaun, nune’e ita bele implementa ona,” Rui Manuel Gago Exposto hateten ba Agência TATOLI relasiona ho komemorasaun Loron Mundiál ba Justisa Sosiál ne’ebé mundu selebra kada 20 fevereiru, iha nia knaar fatin, Caicoli, Dili, tersa ne’e.

Nia hatutan, asuntu defisiénsia presiza ministériu no sekretáriu Estadu sira hotu nia kontribuisaun no atensaun, la’ós Ministériu Solidariedade Sosiál no Inkluzaun (MSSI) nia knaar de’it.

“Asuntu defisiénsia ne’e presiza liña miniteriál sira-nia atensaun hotu no labele hanoin dehan MSSI nia servisu de’it. Tanba ita involve hotu ministériu sira iha Planu Asaun Nasionál ba Ema ho Defesiénsia hodi bele tau hanoin ka planu hamutuk hodi haree ba ita-nia maluk defisiénsia ho iguál ba asuntu saida de’it,” nia dehan.

Nia dehan, agora dauduan elabora hela esbosu Planu Asaun Nasionál ba Ema ho Defisiénsia hodi sai hanesan guia ba liña ministériu no sekretáriu hotu atu tau planu tuir sira-nia kompeténsia para bele hadi’a hamutuk asuntu refere.

“Objetivu kria planu asaun ida-ne’e atu guia hodi ministériu sira hotu, hodi tau planu kada tinan nian tuir sira-nia kompeténsia rasik, nune’e bele rezolve problema ema ho defisiénisa iha Timor-Leste,” nia dehan.

Nia hateten, tanba Planu Asaun ne’e mak presiza ministériu sira tau iha konsiderasaun ba sira-nia planu, nune’e ema ho defisiénsia bele iha asesibilidade ba infraestrututa, edukasaun, justisa no buat seluk tan.

“Ha’u la hatene. Iha Ministériu Públiku no Tribunál, iha ema ba péritu lian jestuál tanba bainhira akontese problema ba ema defisiénsia tilun tanba nia labele rona, entaun ita presiza lian jestuál mak foin rezolve problema. Ida-ne’e sai problema boot ida ba ita,” nia hateten.

Diretór ne’e hatutan, iha mós problema seluk ne’ebé mak defisiénsia matan enfrenta mak laiha asisténsia ba nia problema rasik. Tanba ne’e, nia dehan, Governu hakarak liña ministeriál sira ne’ebé mak toma konta ba ema ho defisiénsia atu konsidera iha sira-nia planu.

“Objetivu importante hosi Planu Asuan Nasionál ne’e nia lalaok mak oinsá kada ministériu bele halo nia funsaun liga ba ema ho defisiénsia,” nia dehan.

Nia subliña, hanesan Ministériu Obras Públika (MOP) tenke konstrui edifíisiu ida ho asesibilidade ba ema ho defesiénsia, nune’e bele iha igualdade ba ema hotu-hotu tantu ema normál sira.

“Ha’u iha faktu konkretu ida mak edifisíu Komisaun Nasionál Eleisaun (CNE-sigla portugés) ne’e iha ona asesibilidade ba ema ho defisiénsia, tanba ema hotu bele asesu ona ba fatin ne’e. Ita iha problema boot, tanba ita iha limitasaun rekursu no fasilidade, nune’e ita labele halo di’ak ba sira. Entaun, ema hanoin ita diskrimina sira maibé tuir loloos ne’e, lae, tanba rekursu mak menus,” nia esplika.

Nia hateten, maske iha limitasaun ba rekursu no fasilidade maibé MSSI nafatin iha polílitka hodi promove no proteje ema ho defesiénisa sira liuhosi sensibilizasaun ba liña miniteriál sira hotu katak tenke promove direitu defesiénsia sira-nian.

Jornalista: Osória Marques

Editór: Cancio Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here