Diretór Ezekutivu Asosiasaun Defisiente Timor-Leste (ADTL), Cesário da Silva. Imajen TATOLI/Arminda Fonseca.

DILI, 22 fevereiru 2021 (TATOLI)—Diretór Ezekutivu Asosiasaun Defisiente Timor-Leste (ADTL), Cesário da Silva, hateten maske mundu selebra Loron Mundiál ba Justisa Sosiál (20 fevereiru) kada tinan maibé iha Timor-Leste sei akontese nafatin injustisa sosiál ba ema ho defisiénsia sira.

Notísia Relevante: MSSI haree injustisa no lakohi tau Ema ho Defisiénsia iha kotuk

Nia hatutan, justisa sosiál ne’ebé akontese iha Timor-Leste mak públiku sei kontinua diskrimina ema ho defisiénsia sira hodi partisipa iha dezenvolvimentu nasional liuliu asesibilidade iha fatin públiku sira. 

“Ha’u atu hateten katak Loron 20 fevereiru ne’e nu’udár loron importante ida ba ita atu refleta fali ita-nia situasaun sira liuliu situasaun povu Timor-Leste nia moris. Asosiasaun Defisiente Timor-Leste ninia preokupasaun mak iha Timor-Leste ne’e sei akontese nafatin forma injustisa sosiál ida ba ema ho defisiénsia liuliu asesibilidade iha fatin públiku,” Cesário da Silva hateten ba Agência TATOLI relasiona ho komemorasaun Loron Mundiál ba Justisa Sosiál, iha nia kna’ar fatin edifísiu ADTL, Quintal-Boot, Dili, segunda ne’e.

Nia haktuir, asesibilidade ema ho defisiénsia iha fatin públiku menus entaun sira labele asesu no sira-nia involvimentu mós menus tebes, entaun sira moris hela iha injutisa sosiál ida-nia laran.

Atu asesgura justisa sosiál ida ne’ebé loloos iha nasaun ida-ne’e, nia sujere, atu ema hotu-hotu liuliu ema ho defisiénsia sira bele hamriik hamutuk ho ema seluk iha filleira prosesu dezenvolvimentu ne’ebé hanesan.

 “Ami-nia observasaun ba justisa sosiál ne’e rasik, ami sujere atu ema hotu-hotu iha filleira ne’ebé hanesan iha prosesu dezenvolvimentu nasionál. Tanba durante ne’e, fileira prosesu dezenvolvimentu ne’e, ami konsidera no haree katak ema ho defisiénsia sira-ne’e iha kotuk hela de’it,” nia dehan.

Nia hateten, naturalmente ho limitasaun sira-ne’ebé iha, laiha konstrusaun ne’ebé asegura asesibilidade ba fatin no edifísiu públiku sira. Tanba ne’e, nia rekomenda ba entidade no governante sira hotu atu asegura asesibilidade iha fatin hotu-hotu.

“Ho forma ida-ne’e, ami rekomenda ba entidade no governante sira hotu katak atu asegura asesibilidade iha fatin hotu-hotu, tantu asesibilidade fíziku no maneira sira hotu ho sensível ba ema ho defisiénsia. Nune’e, ita bele asegura justisa ida ho loloos. Tanba, grupu ho ema defisiénsia mós hola parte iha sosiedade,” nia dehan.

Jornalista: Arminda Fonseca 

Editór: Cancio Ximenes

HAKEREK NO HATÁN

Please enter your comment!
Please enter your name here