Prezidente Agência TATOLI, Manuel Pinto. Imajen TATOLI/Egas Cristovão.

DILI, 23 fevereiru 2021 (TATOLI)—Prezidente Konsellu Diretivu Agência TATOLI,I.P Manuel Pinto, hateten rekrutamentu ba kandidatu funsionáriu TATOLI nian foin lalais ne’e, bazea ba Planu Asaun Anuál (PAA) TATOLI,I.P nian ne’ebé mak integra ona.

Notísia Relevante: Kandidatu funsionáriu TATOLI 154 tuir ezame eskrita

“TATOLI halo rekrutamentu adapta ba Planu Asaun Anuál ne’ebé TATOLI prevee ona ba tinan ida liuliu iha 2021 ne’e, tanba ida-ne’e hanesan parte ida hosi programa TATOLI nian. Karik iha mídia seluk ne’ebé hasai jornalista ka nia traballadór, ne’e la’ós kestaun TATOLI nian,” Manuel Pinto hateten ba jornalista sira iha nia knaar fatin, Faról, Dili, tersa ne’e.

Manuel Pinto hateten, rekrutamentu ba kandidatu funsionáriu TATOLI nian ne’e vale ba ema hotu-hotu, ba timoroan hotu, la’ós vale de’it ba instituisaun mídia sira-ne’ebé mak daudaun ne’e hasai sira-nia serbisu-na’in (jornalista) sira ne’ebé mai konkorre ba vaga TATOLI nian ne’e.

“Kestaun instituisaun balun ne’ebé mak hasai ninia jornalista ne’e, ba ha’u, TATOLI laiha problema ho sira ne’e hotu. Tanba, TATOLI nia-rekrutamentu ne’e integra ba Planu Asaun Anuál TATOLI nian, entaun iha obrigasaun TATOLI tenke realiza,” nia esklarese.

Prezidente Konsellu Diretivu Agência TATOLI ne’e hateten, bainhira sei iha prosesu nia-laran ne’e kestaun instituisaun mídia ho sira-nia traballadór nian maibé bainhira ema hirak ne’e sai ona funsionáriu TATOLI nian, entaun ne’e kompeténsia TATOLI nian ona.

“Ami halo rekrutamentu ne’e, labuka tuir nia servisu iha GMN ka RTTL, Timor Post, Indenpenden ka STL.  Sira-ne’e mai tuir rekrutamentu ne’e, ninia direitu. Tanba desizaun atu mai tuir ka lae, personalidade ema ida mai tuir ne’e, nia problema. Ami sei la ba buka tuir ema ida-idak iha sira-nia servisu fatin,” nia hateten.

Iha konstituisaun RDTL artigu 50 (Direitu Ba Servisu) haktuir; (1) Sidadaun hotu-hotu, feto ka mane, iha direitu no devér atu halo servisu no livre atu hili nia profisaun; (2) Traballadór sira iha direitu ba seguransa no hetan mós hosi servisu fatin ba selu-kole, deskansu no mós férias; (3) Labele hasai ema serbisu-na’in sira wainhira la iha kauza justa (loloos) eh tan de’it motivu polítiku, relijozu ka idiolójiku; (4) Proibidu obriga ema serbisu, maibé ne’e la halakon buat ne’ebé maka iha lejizlasaun konaba ezekusaun kastigu nian; (5) Estadu haburas kriasaun (haki’ak) kooperativa ba produsaun no fó tane ba empreza família nian nu’udar fatin atu hetan serbisu.

Jornalista: Osória Marques

Editór: Cancio Ximenes

1 KOMENTÁRIU

  1. atu fo hanoin deit,ba Tatoli..rekrutamentu ba sidadaun timor oan nee..tenki haree kandidatus sira nia familia balun servisu ona iha instituisaun estado ka Goevrno ona ka lae??La-bele fo liu ema sira nebe familia tomak ou fen laen no oan servisu hotu instituisaun estadu..ema seluk sai haree deit..iha TL agora dadaun La-bele kolia konaba kapasidade..tanba ema sira nebe hasai kursu bot-bot iha rai liu mai servisu ho ita lider sira mos La-halo mudansa barak..hau kaer PM Taur liafuan ..riku soin fahe hanesan fo oportunidade ba ema hotu..agora grupo oan deit manan oson povo nian..ami sei halo investigasaun servidor estado halo ho KKN.iha familia balun la-iha ema servisu iha insttituisaun estado…

HAKEREK NO HATÁN

Please enter your comment!
Please enter your name here