Kandidatu funsionáriu TATOLI,I.P-Agência Noticiosa Timor-Leste na’in 154. Imajen/Tatoli.

DILI, 22 fevereiru 2021 (TATOLI)–Kandidatu funsionáriu TATOLI,I.P-Agência Noticiosa Timor-Leste na’in 154, kompostu husi administrasaun na’in 74 no redasaun na’in 80, tuir ezame eskrita iha Universidade Nasionál Timor Lorosa’e (UNTL), Kampus Fakuldade Siénsia Sosiál (FSS), Caicoli, Dili, ohin.

“Rezultadu ba kandidatu sira-ne’ebé hatama dokumentu hamutuk atus lima resin no selesaun ne’ebé komisaun halo durante loron rua iha semana kotuk ba selesaun dokumentu hamutuk ema na’in 171, kompostu husi redasaun hamutuk ema na’in 84 no parte Administrasaun 87,” Prezidente Komisaun Organizadora, Xisto Freitas informa.

Totál kandidatu sira ne’e, tuir prezidente komisaun Xisto Freitas katak pasa ona iha selesaun dokumentu hamutuk 171 no hosi hirak ne’e iha ema na’in-154 mak tuir ezame eskrita tuir ida-idak nia área.

Área sira ne’e mak hanesan parte administrasaun kompostu husi Asistente Aprovizionamentu hamutuk na’in 12, Ofisiál Finansa na’in 13, Ofisiál Lojístika na’in 4, Rekursu Umanu na’in 7 no Asistente Administrasaun na’in 38.

Redasaun nian mak hanesan Jornalista Munisípiu na’in 27, Jornalista Língua Portugeza na’in 8, Jornalista Língua Ingleza na’in 4, Jornalista Dalen Indonézia na’in 12, Editór Dalen Portugés na’in 2, Editór Língua Ingleza na’in 2, Editór Língua Indonézia na’in 4, Sinegrafista ka Videografer na’in 11, Fotografer na’in 8 no Infografista na’in 2.

Prezidente komisaun ne’e informa, TATOLI halo rekrutamentu ba funsionáriu sira ne’e bazea ba nesesidade. Nesesidade ne’e, tuir ezekutivu ne’e katak bazea ba PAA (Planu Asaun Anuál) ne’ebé kontempla mós iha Orsamentu Jerál Estadu (OJE) 2021, ne’ebé ko’alia kona-ba espansaun kontéudu notísia, presiza avansa espasu ba iha língua portugeza, ingleza, tetun no multimedia nian.

Vise-prezidente I, Asuntu Mídia no Jornalístika ne’e espera, kandidatu sira ne’ebé tuir ona ezame eskrita bele liután ba iha faze entrevista nian.

“Karik liu iha teste, bele serbisu hamutuk ho jornalista sira atu lori TATOLI hanesan instituisaun mídia Estadu, bele fó satisfasaun ba públiku tomak liuhusi informasaun no presiza tebes rekursu ne’ebé mak kualidade”.

Ezame eskrita ba kandidatu funsionáriu TATOLI,I.P na’in 154 ne’e, partisipa iha ezame eskrita hahú tuku 9h30 to’o 11h30, iha salaun 19 no 21.

Iha atividade ezame eskrita ne’e, tuir observasaun jornalista nian nota katak la’o di’ak no kandidatu sira kumpre padraun no protokolu Organizasaun Mundiál Saúde (OMS) no Ministériu Saúde (MS) nian katak uza máskara, hodi prevene surtu COVID-19.

Jornalist: Arminda Fonseca

Editór:  Cancio Ximenes

HAKEREK NO HATÁN

Please enter your comment!
Please enter your name here