Votasaun konta jerál Estadu 2019, iha sala plenária Parlamentu Nasionál, tersa (23/02). Imajen/Mídia PN

DILI, 23 fevereiru 2021 (TATOLI)—Parlamentu Nasionál, tersa ne’e, aprova Konta Jerál Estadu 2019 nian ho rezultadu votasaun a-favór 36, kontra 0 no abstensaun 12.

Notísia Relevante: Bankada CNRT apresia relatóriu Kámara Konta iha OJE 2019

“Parlamentu Nasionál espera Governu kumpre rekomendasaun ne’ebé partilla iha plenária ne’e,” Prezidente Parlamentu Nasionál, Deputadu Aniceto Longuinhos Guterres Lopes, informa liuhosi plenária Parlamentu Nasionál.

Totál Orsamentu Jerál Estadu (2019) nian hamutuk biliaun $1,482 ne’ebé koloka ba saláriu no vensimentu millaun $214,225, bens (sasán) no servisu millaun $472,880, transferénsia públika millaun $362,698, kapitál menór $31,476 no kapitál dezenvolvimentu millaun $400,721.

Hosi montante orsamentu biliaun $1,482 ne’e kompostu hosi kompromisu sira ezekuta ona $39,649,845.67, obrigasaun sira ezekuta $65,156,013.10, ezekusaun atuál $1,233,297,173.17 no saldo hela $144,176,015.35 no persentajen ezekusaun atinje 87,6%.

Bankada Frente Revolusionária Timor-Leste Independente (FRETILIN) liuhosi Deputada Maria Angélica Rangel, husu VIII Governu Konstitusionál atu koopera Kámara Konta hodi aprezenta relatóriu orsamentál ho transparénsia.

“Husu ba membru Governu atu fó segimentu ho responsabilidade kona-ba utilizasaun orsamentu Estadu nian ba Kámara Konta no husu Ministru Finansa atu hadi’a dívida naun-finanseira ne’ebé sempre akontese kada tinan. Ami hakarak husu governante sira atu iha governasaun ne’ebé moos hodi garante boa governasaun,” Deputada Maria Angélica Rangel fó hanoin.

Nune’e mós Bankada Kongresu Nasionál Rekonstrusaun Timor (CNRT, sigla portugés) liuhosi Deputada Maria Fernanda Lay apresia ho relatóriu hosi Kámara Konta nian.

“Maibé ami haree Governu laiha seriedade tanba ko’a fali 7% kada ministériu sira hodi finánsia programa cesta bázika ne’ebé la ezisti iha OJE 2021, atraza selu emprezáriu no kompañia sira, selu tarde saláriu funsionáriu públiku sira. Deskobrementu sira husi Kámara Kontas ne’e hatudu katak Governu bainhira rekolla reseita, alokasaun, ezekusaun orsamentu iha aprezentasaun tenke konsolida hamutuk iha perímetru orsamentál nian,” nia katak.

Entretantu Bankada Partidu Libertasaun Populár (PLP) liuhosi Deputada Maria Angelina Lopes Sarmento, apresia ho rekomendasaun Kámara Konta nian.

“Ami husu Governu tau importánsia ba rekomendasaun Kámara Konta nian oinsá ezekuta osan públiku nian, presiza hadi’a liután ezekusaun orsamentál, ami husu gasta osan ne’e ho responsabilidade iha orsamentu tinan tuir mai,” Bankada PLP propoin.

Bankada PLP mós Governu kumpre rekomendasaun kona-ba levantamentu fundu minarai ne’ebé liu Rendimentu Sustentável Estimadu (RSE) no uza loloos rezerva kontinjénsia.

Xefe Bankada Partidu Demokrátiku (PD), Deputadu António da Conceição ‘Kalohan’ husu atu Ministériu Finansa apoia liña ministeriál relasiona ho rekomendasaun hosi Kámara Konta nian.

“Amu husik hela pergunta, tanbasá mak kontratu anterior seidauk realiza pagamentu, hanesan programa cesta bázika,” Bankada PD hateten.

Entretantu Vise-Xefe Bankada Kmanek Haburas Unidade Nacional Timor Oan (KHUNTO), Deputadu António Verdiál de Sousa, hateten relatóriu no paresér hosi Komisaun C no rekomendasaun hosi Kámara Konta Governu tenke kumpre.

Bankada KHUNTO husu VIII Governu Konstitusionál atu hadi’a di’ak liután utilizasaun osan públiku nian, loron ida presiza halo levantamentu ba fundu petrolíferu maibé tenke nesesáriu.

“Tanba importante liu mak sustentabilidade ba fundu minarai, ho nune’e husu hadi’a-aan nafatin, maibé ami sei ko’alia nafatin bainhira ami deteta buat balu ne’ebé mak loloos iha ezekusaun orsamentál,” Deputadu António Verdiál fó hanoin.

Ikusliu Bankada Frente Mudansa (FM), União Democrátika Timorense (UDT) no Partidu Unidade Nasionál Demokrátiku (PUDD) fó hanoin ba governu atu kumpre ho responsabilidade kona-ba audioria hosi Kámara Konta nian nune’e orsamentu tinan fiskál tuir mai labele komete tán irregularidade.

Hatán ba ne’e, Ministru Finansa Rui Gomes apresia ho rekomendasaun Kámara Konta no Komisaun C liuhosi KJE 2019 nian.

“Liuhosi esforsu ne’ebé koletiva mak ita bele alkansa buat ne’ebé boot,” Ministru Finansa hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here