Deputada, Maria Teresinha Viegas.

DILI, 23 fevereiru 2021 (TATOLI)—Bankada Congresso Nacional De Reconstrução de Timorense (CNRT) apresia ho relatóriu no fiskalizasaun hosi Kámara Konta (Cdc-sigla portugés) ne’ebé fó atensaun ba Governu hodi halo korresaun iha ezekusaun Orsamentu Jerál Estadu (OJE) 2019.

Notísia Relevante: Ministru Rui Gomes reprezenta PM Taur iha debate KJE 2019

“Bankada CNRT fó apresiasaun ba relatóriu no fiskalizasaun Kámara Kontas ida ne’e, relatóriu ida-ne’e hateten mai Parlamentu Nasionál atu bolu atensaun ba Governu no entidade públika hotu-hotu atu kontinua halo korresaun, hadi’ak lapsu no labele komete beibeik irregularidade iha uzu rekursu públiku nian,” Reprezentante Bankada CNRT, Deputada Maria Teresinha Viegas informa iha ámbitu dsikusaun Konta Jerál Estadu (KJE) 2019 nian, iha plenária Parlamentu Nasionál, tersa ne’e.

Kompete ba Tribunál Superiór Administrativu, Fiskál no Konta (Tribunál Rekursu) liuhosi Kámara Konta atu halo fiskalizasaun ba legalidade reseita no utilizasaun Orsamentu Jerál Estadu kada tinan ba interese públiku nian.

Objetivu hosi fiskalizasaun Tribunál nian mak aleinde halo korresaun finanseiru, buka hatene ezekusaun orsamentu tuir lei no assegura katak orsamentu ezekuta tuir duni prinsípiu efisiénsia no efikásia iha jestaun públiku nian.

Apresia Kámara Konta iha melloramentu tinan-tinan hodi introdús iha nia paresér kona-ba Konta Jerál do Estadu, tantu iha termu aprezentasaun, estrutura no konteúdu.

Nune’e mós melloria iha artikulasaun entre instituisaun kontrollu sira ein-jerál kompara ho nasaun Pro-PALOP no nasaun CPLP ne’ebé Timor-Leste iha Terseiru-Lugar.

Bankada CNRT mós fó apresiasaun boot ba kriasaun Fundu Dezenvolvimentu Kapital Umanu (FDCH) iha tinan 2011 tanba fó duni atensaun ba dezenvolvimentu ho baze umanu, fundu ne’e halo timoroan rihun ba rihun hetan benefísiu ba bolsa estudu, simu formasaun iha rai laran no rai-li’ur no tuir formasaun prefisionál ba sira-nia karreira.

FDCH kumprimenta Planu Estratéjiku Dezenvolvimentu (PED) 2030 hodi harii baze ba rekursu umanu Timor-Leste ne’ebé projeta ba dezenvolvimentu sustentável, hasa’e kuantidade umanu, hadi’ak administrasaun públika no hadi’ak kualidade vida ema moris nian.

Relatóriu Kámara Konta (CdC) manifesta importánsia hosi fundu ida-ne’e, maibé presiza hadi’ak nia jestaun no ezekusaun, hadi’ak tipu formasaun, halo klasifikasaun ba bolsa estudu no oinsá eskolla nível edukasaun.

Hafoin halo leitura ba Relatóriu Kámara Kontas nian kona-ba Konta Jerál do Estadu 2019, Bankada CNRT deskobre kestaun parsialmente Governu no entidade relevante foin ezekuta 12 rekomendasaun hosi 26 rekomendasaun relatóriu CdC iha Konta Jeral Estadu 2018 nian.

“Ne’e hatudu Governu seidauk sériu hadi’ak-aan no kontinua komete lapsu no irregularidade tanba saldu tezouru Estadu iha 31 Dezembru 2019 demonstra ho valór globál hamutuk millaun $278.1, konforme CdC relata katak, saldu ida-ne’e la engloba RAEOA, ANPM no IPG nian,” Bankada CNRT akresenta iha deklarasaun polítika iha debate KJE 2019 ne’e.

Bankada CNRT haktuir, Cdc deskobre iha 2019 ministériu sira sei halo kontratu-obrigasaun ho empreza sira atinje to’o millaun $3,6, kontratu obrigasaun ne’e ultrapasa tiha tempu pagamentu nian iha tinan fiskál ida-nia laran

Nune’e mós dívida naun-finanseira por kategoria ekonómika aprezenta millaun $27,8 ne’ebé Governu seidauk selu tanba monu ona tempu ba pagamentu nian. Dívida naun-finanseira ne’e involve entidade administrasaun direta, ajénsia autónoma no orsamentu ba munisípiu sira-nian.

“RAEOA iha finál 2019 akumula saldo tezouru boot tebes iha sira-nia konta, totál akumulasaun millaun $253,4, kuaze ekilíbriu ho saldu tezouria Estadu ne’ebé totál millaun $278,1. RAEOA rai osan barak iha saldo, enkuantu tinan-tinan obriga tenke foti osan fundu petrolíferu liu Rendimentu Sustentável Estimadu (RSE) liu 3% tuir lei haruka,” Bankada CNRT kestiona.

Tuir relatóriu CdC hatudu katak, reseita doméstika RAEOA millaun $5,9 la haruka ba iha konta Estadu. Alainde ida-ne’e, relatóriu ezekusaun RAEOA iha 4 trimestre nian la aprezenta ba iha Ministériu Finansa, tanba-ne’e mak Ministériu Finansa la entrega relatóriu RAEOA nian (relatóriu ezekusaun 4 trimestre) ba Kámara Konta.

“Rejista diverjénsia valór adiantamentu ein-diñeiru ne’ebé eziste tuir relatóriu ministériu sira millaun $5,9 no valór konstante tuir relatóriu monitorizasaun pagamentu iha tezouru ne’ebé rejista totál adiantamentu ho montante osan millaun $23,8. Governu ho Kámara Konta uza terminolojia ne’ebé la hanesan iha Konta Jerál Estadu, kestaun ne’e difikulta CdC no hamosu diskripánsia iha dadus ne’ebé aprezenta iha relatóriu ida-ne’e,” Bankada CNRT krítika.

Haree ba kestaun hirak ne’e, Bankada CNRT preokupa liután ho situasaun jestaun orsamentu atuál ne’ebé la’o rungu-ranga, sikúlu orsamentu sai la normál, halo mudansa ba sistema finansa no viola halimar Lei Orsamentu no Jestaun Finanseira (LOGF-sigla portugés).

Bankada CNRT haree basa hirus matan ho orgullu bainhira introdús orsamentu bazea ba programa maibé foin de’it mak koko atu implementa, hahú kedan ho ko’a 7% orsamentu kada ministériu sira hodi finansia programa cesta bázika ne’ebé la eziste iha OJE 2021, atraza selu emprezáriu no kompañia sira, selu tarde saláriu funsionáriu públiku sira.

Deskobretamentu sira hosi Kámara Kontas ne’e hatudu katak Governu bainhira rekolla reseita, alokasaun, ezekusaun orsamentu iha aprezentasaun tenke konsolida hamutuk iha perímetru orsamentál nian.

“Saldu RAEOA, ANPM no IPG tenke konsolida hamutuk iha saldu tezouro Estadu nune’e labele hamosu dezorsamentasaun,” Bankada CNRT fó hanoin ba Governu.

Tanba-ne’e, Bankada CNRT husu ba Governu atu rejista reseita hotu-hotu, impostu no jurus bankáriu, ezemplu jurus saldu RAEOA, ANPM no IPG ne’ebé durante ne’e la rejista iha Konta tezouro Estadu nian.

Relasaun ho reseita doméstika seidauk kobre 10% hosi totál orsamentu tinan-tinan, Bankada CNRT husu ba Governu atu buka kompleta enkuadramentu legál sira relasaun ho rekolla impostu doméstika tanba nesesidade dezenvolvimentu aumenta, enkuantu reseita doméstika hetok kiik ba beibeik.

Tanba-ne’e presiza aselera Lei Bens Apreendidos no Lei de Recuperação de ativos, hodi nune’e, Governu bele halo alíneasaun ba sasan illegál no sasán korrupsaun hodi hatama reseita ba Estadu.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here