Ministru Finansa, Rui Gomes.

DILI, 23 fevereiru 2021 (TATOLI)—Ministru Finansa (MF) Rui Gomes, ohin, reprezenta Primeiru Ministru Taur Matan Ruak iha debate Konta Jerál Estadu (KJE) 2019 nian iha uma fukun Parlamentu Nasionál.

Notísia Relevante: Konta Jerál Estadu 2019 iha infrasaun finanseira

“Ohin, Ministru Finansa reprezenta señor Primeiru Ministru iha debate Konta Jerál Estadu 2019 ne’e,” Prezidente Parlamentu Nasionál, Deputadu Aniceto Longuinhos Guterres Lopes, informa liuhosi plenária Parlamentu Nasionál.

Iha diskusaun KJE 2019 ne’e akompaña mós Vise-Ministra Finansa Sara Lobo Brites.

Maibé, Prezidente Komisaun C (Finansa Públika), Deputada Maria Angélica Rangel lamenta tanba loloos ne’e membru Governu sira-ne’ebé halo audisaun ho parlamentu kona-ba KJE tenke partisipa hotu.

“Loloos ne’e ministériu ne’ebé halo audiénsia ho komisaun C tenke hatán pergunta ne’ebé sira seidauk responde, maibé ohin Ministru Finansa no Vise-Ministra mak mai de’it,” Prezidente Komisaun C ne’e kestiona.

Hatán ba preokupasaun ne’e, Prezidente Parlamentu Nasionál, Deputadu Aniceto Guterres, esplika Ministru Finansa reprezenta ministériu tomak.

Iha diskusaun ne’e diskute kona-ba ezekusaun Orsamentu Jerál Estadu (OJE) 2019 nian ho montante biliaun $1.4.

Iha debate ne’e, Xefe Bankada Kmanek Haburas Unidade Nacional Timor Oan (KHUNTO), Deputada Olinda Guterres, krítika membru parlamentu sira-ne’ebé sempre tama tarde iha diskusaun importante sira hanesan KJE 2019 ne’e.

“Señor Ministru Finansa no Vise-Ministra Finansa mai dezde ohin, deputadu sira bankada Governu nian seidauk mai. Ita tenke kumpre oras ho loloos, labele kontinua beibeik hanesan ne’e,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here