Ferik Idozu (terseira idade) sira forma no tuur hein hela iha Banku hodi simu pagamentu husi governu liu husi Banku Nasional Comersiu Timor Leste, Dili. Imajen TATOLI/Antonio Goncalves.

DILI, 23 fevereiru 2021 (TATOLI)—Prezidente Konsellu Institutu Seguransa Sosiál (INSS), Longuinhos Armando Leite, hateten pagamentu normál ba faze daruak tinan 2020 nian, finaliza ona foin lalais ne’e maibé idozu iha munisípiu balun seidauk simu osan tanba dokumentu balun hanesan naran no númeru kódigu atu simu osan ne’e laloos.

Notísia Relevante: 2019,MSSI Hasai Idozu 768 Hosi Sistema Pagamentu

“Ha’u hateten beibek katak dala ruma iha faze dahuluk osan sira la foti. Fulan neen ona iha banku sira-nia naran labele mosu ona no sira komplein fila-fali xefe suku lori ba sosiál mai fali iha INSS mak ita hatama fali audisionál,” Longuinhos Armando Leite hateten ba Agência TATOLI via telefónika, tersa ne’e.

Nia dehan, idozu sira-ne’ebé la simu osan ne’e akontese ba munisípiu hotu-hotu no munisípiu balu hanesan Manufahi no Bobonaro, ekipa INSS ba halo monitorizasaun mak sira-nia naran no númeru iha kaderneta ne’e, iha sistema banku ne’e la hanesan entaun ida-ne’e mak prezudika tanba osan iha maibé naran la mosu.

Nia hateten, bainhira halo pagamentu mak sira (idozu) laiha fatin, problema mak osan sira labele foti entaun osan ne’e depozita fila-fali ba banku.

“Bainhira ami halo pagamentu ne’e xefe suku sira iha ami-nia sorin. Ne’ebé, ami hateten katak bainhira sira-ne’ebé la foti agora, entaun sira tenke fó kartaun eleitorál ba xefe suku, entrega ba ami-nia tékniku relata mai ami no ami halo pedidu ba banku no banku selu fali sira,” nia dehan.

Kona-ba dadus idozu sira-nian ne’ebé seidauk simu pagamentu, nia hateten, Institutu Seguransa Sosiál (INSS) seidauk hatene tanba hosi parte banku seidauk fó dadus fó dadus ba sira.

“Banku fó ona dadus mak ami hatene katak pagamentu faze daruak ne’e, totál normál ne’e hira, selu hira no seidauk selu ne’e ema na’in hira, ne’e ami bele hatene. Tanba, pagamentu foin ramata,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here