Votasaun konta jerál Estadu 2019, iha sala plenária Parlamentu Nasionál, tersa (23/02). Imajen/Mídia PN

DILI, 23 fevereiru 2021 (TATOLI)—VIII Governu Konstitusionál kompromete sei implementa rekomendasaun Kamára Konta no Komisaun C (Finansa Públika) iha Parlamentu Nasionál (PN) atu garante Konta Jerál Estadu no Orsamentu Jerál Estadu (OJE) tuir regra legál no prátika kontabilidade internasionál.

“Governu kompromete implementa rekomendasaun hosi Kámara Kontas no Komisaun C, atu nune’e Konta Jerál Estadu Timor-Leste respeita obrigasaun legál hotu no mellora konta públiku inklui bele tuir prátika kontabilidade internasionál,” Minsitru Finansa, Rui Augusto Gomes, hateten iha sala plenária PN, tersa ne’e.

Notísia relevante: PN aprova Konta Jerál Estadu 2019

Ministru Rui Gomes hato’o kompromisu ne’e, hafoin reprezenta Primeiru-Minsitru, Taur Matan Ruak, iha debate Konta Jerál 2019 iha Uma-fukun.

Governante ne’e hatutan, daudaun Ministériu Finansa (MF) dezenvolve hela inistiva atu halo alterasaun nesesária ba implementasaun rekomendasaun hotu kona-ba Konta Jerál Estadu inklui OJE.

“Inistiva hirak ne’e hahú inklui ona iha OJE 2020 no 2021 tanba ne’e sei akontese iha Konta Jerál Estadu  2020,” nia garante.

Maski nune’e, Governu garante katak Konta Jerál Estadu 2019 tuir duni operasaun ezekusaun Orsamentál no kumpre rekezitu legál.

“Ami fiar katak Konta Jerál Estadu 2019 reprezenta fiel operasaun kontabilidade ezekusaun orsamentál no kumpre rekezitu legál tomak, ne’ebé permite Parlamentu Nasionál no kamára Konta ezerse atribuisaun akompañamentu iha fiskalizasaun konta públiku,” governante ne’e otimista.

Entretantu, iha rekomendasaun lubuk hosi Komisaun C liuhosi debate Konta Jerál Estadu 2019 hodi Governu kumpre tanba perímetru orsamentál 2019 iha dezorsamentasaun.

Komisaun C rekomenda re-abertura proposta-lei rekuperasaun no jestaun ativu Estadu

Iha relatóriu no paresér Komisaun C, rekomenda ba PN atu re-abertura proposta-lei relasiona ho rekuperasaun no jestaun ativu Estadu ne’ebé kaduka iha 2015 ba forma projetu-lei.

Komisaun C rekomenda Governu implementa polítika estratéjika ida hodi hasa’e reseita doméstika naun-petrolífera no presiza halo redusaun signifikativa ba dependénsia reseita petróleu, redús gastu reseita petrolífera liu Rendimentu Sustentál Estimadu (RSE) hodi finansia despeza korrente sira.

Alende ne’e, rekomenda  mós kolokasaun fundu kapitál umanu tenke foka iha kualidade ensinu no asegura konkordánsia no transparánsia iha konkursu públiku sira predominánsia ajustu direitu.

Komisaun ne’e mos  husu ezekutivu sira asegura unidade universidade no espesifikasaun orsamentu hanesan plena konsolidasaun iha konta públika no unidade.

Komisaun Finansa Públika ne’e husu mós Governu implementa kontrolu rigorozu no efikáz ba despeza korrente inklui despeza viajen no utilizasaun rezerva kontinjénsia kada tinan fiskál.

Ikus liu, Komisaun C apresia fiskalizasaun Kámara Konta ho forma verdadeira no apropriada ein termu uza materiál relevante kona-ba ezekusaun orsamentál 2019 tanba bazeia ba norma no prinsípiu aplikável.

Iha auditoria hosi Kámara Konta, deskobre perímetru orsamentál hosi Autoridade Nasionál Petróleu no Minerál (ANPM), Institutu Petróleu no Jeolojia (IPG, sigla portugés) no Rejiaun Administrativa Espesiál Oé-cusse-Ambeno (RAEOA) iha dezorsamentasaun atentária iha unidade orsamentál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here