Administradór Munisípiu Aileu, Abel da Conceição, ho nia família. Imajen/Espesiál.

DILI, 23 fevereiru 2021 (TATOLI)—Governu liuhosi Ministru Administrasaun Estatál, Miguel Pereira de Carvalho, husu ba administradór foun Munisípiu Aileu nu’udár reprezentante Governu nian iha munisípiu, tanba ne’e tenke asegura funsionamentu servisu Administrsaun Lokál Estadu nian iha munisípiu.

Notísia Relevante: MAE ensera formasaun ba Adminitradór Munisípiu Aileu-Ainaro-Covalima

“Liuhosi aktu ofisiál ida-ne’e, Governu hakarak hafoun-fali ninia konfiansa ba administradór foun, hodi asume kargu nu’udar Governu nian reprezentante lokál iha Munisípiu Aileu. Tanba ne’e, tenke asegura normál funsionamentu servisu administrsaun lokál Estadu nian iha Munisípiu Aileu no responde atividade hotu perante membru Governu ne’ebé responsável ba Administrasaun Estatal,” Miguel Pereira de Carvalho hateten iha ninia diskursu iha serimónia tomada de pose ba Administradór foun Munisípiu Aileu, Abel da Conceição ne’ebé Agência TATOLI asesu, tersa ne’e.

Nia hatutan, aktu ofisiál ida-ne’e hakarak ekspresa hanoin ida katak servisu ne’ebé administradór foun atu hala’o ba oin ne’e, la’ós buat kmaan ida maibé servisu ne’e todan tebes tanba ejize adminitradór nia esforsu atu ho badinas bele serbi ba ema hotu.

“Ita sei hasoru momentu barak ne’ebé ejize ita-nia sakrifísiu. Ita dala barak tenke hakraik-aan hodi bele sai nu’udar instrumentu Estadu nian ida ne’ebé halibur sidadaun sira hotu, iha hala’o planu dezenvolvimentu nasionál nu’udár Administradór Munisipál. Ita prontu ona atu kaer responsabilidade no hasoru dezafiu hirak ne’ebé atu mosu mai,” nia dehan.

Tanba ne’e, nia bolu atensaun ba administradór foun atu programa munisipál labele haketak-aan hosi programa nasionál, ne’ebé trasa ona iha PEDN no Programa sira iha nivél lokál tenke han malu ho programa nasionál, atu nune’e labele hamosu diskrepansia. 

Nia afirma, administradór Munisípiu Aileu ne’ebé reprezentante Governu nian iha munisípiu hodi dirije Administrasaun Munisipál tenke asegura normál funsionamentu servisu Administrsaun lokál Estadu nian iha Munisípiu Aileu no responde atividade hotu perante membru Governu ne’ebé responsável ba Administrasaun Estatál.

“Hanesan reprezentante Governu iha nivél Munisipál, Administradór Munisípiu Aileu dirije no ezerse kompeténsia sira-ne’ebé Governu deskonsentra ona ba iha munisípiu sira, nomeadamente kompeténsia iha domíniu Edukasaun, Saúde, Seguransa Alimentár, Obras Públika no Transporte; Agua, Saneamentu, Ambiente, Agrikultura, Jestaun Merkadu no Turizmu, Asaun Sosiál, Jestaun Dezastre Naturál; Protesaun sivíl, Rejistu Notariadu, no servisu kadastra no apoiu ba organizasaun naun governamentál no organizasaun komunitária sira,” nia hateten.

Hodi ezerse kompeténsia hirak ne’e, Munisípiu sira utiliza instrumentu jestaun sira hanesan Planu Dezenvolvimentu Munisipál, Planu Asaun Anuál, Planu Investimentu Munisipál, Planu Aprovizionamentu Munisipál, Planu Munisipál Formasaun Anuál Rekursu Umanu, no Orsamentu Munisipál ne’ebé aprova hosi Parlamentu Nasionál. 

Tan ne’e, nia husu ba Administradór Aileu ne’ebé foin simu pose iha tarefa no iha dezafiu barak iha oin hodi asegura servisu administrasaun públika nian ne’ebé deskonsentra ona ba munisípiu sira bele implementa ho didiak, hodi garante katak objetivu hosi dezentralizasaun administrativa ne’ebé temi iha Planu Estratéjiku Dezenvolvimentu Nasionál 2011-2030 nian bele atinje ho di’ak.

Nomeadamente, nia garante katak dezenvolvimentu setór privadu iha área rurál, kriasaun oportunidade foun ba partisipasaun demokrátika iha nível lokál, Promosaun Instituisaun Estadu sira-ne’ebé forte no estabelesimentu prestasaun mais efetiva, efisiente no ekuitativa hosi servisu públiku sira.

Ho apoio hosi servisu sentrál sira, nia dehan, Administradór Munisípiu Aileu sei halo esforsu hotu hodi garante katak alunu sira iha eskola pré-primária no ensinu báziku Aileu iha kondisaun mínimu hodi nune’e alunu sira bele tuir prosesu aprendizajen ho di’ak.

Nia dehan, populasaun sira iha Munisípiu Aileu hetan atendimentu saúde di’ak iha Postu Saúde no Sentru Saúde Komunitáriu sira, infrastrutura rurál no urbana ne’ebé adekuadu hodi fasilita moris populasaun nian.

Nia hateten, kanalizasaun bee-moos ba komunidade nia uma no saneamentu adekuadu, apoiu no koordena atividade ekstensaun Agríkola, vasinasaun animál, no apoia inisiativa reflorestasaun, hadi’a funsionamentu merkadu munisipál.

Jornalista: Arminda Fonseca 

Editór: Cancio Ximenes

HAKEREK NO HATÁN

Please enter your comment!
Please enter your name here