Vise-Ministru Administrasaun Estatál, Lino de Jesus Torrezão, hasai retratu hamutuk ho Administradór Munisípiu Aileu, Administradór Munisípiu Ainaro, no Administradór Munisípiu Covalima. Imajen/Media MAE..

DILI, 22 fevereiru 2021 (TATOLI)— Vise Ministru Administrasaun Estatál, Lino de Jesus Torrezão, ohin, ensera formasaun ba Administradór Munisípiu Aileu, Ainaro, no Munisípiu Covalima iha edifísiu MAE. Formasaun ne’e ho objetivu atu administradór sira bele hatene enkuadramentu legál sira no oinsá halo planu ba orsamentu no asaun anuál.

“Formasaun ne’e hala’o hanesan bukae ida ba sira bainhira sai Administradór Munisipiu tenke hatene enkuadramentu legál ne’ebé maka iha liuliu ba dekretu lei númeru 3 ne’ebé mak hakerek tiha ona, no tau atensaun liu  ba dekretu lei Nú.54 no mós oinsá sira bele halo planu ba orsamentu no asaun anual,” Lino de Jesu Torrezão hateten liuhosi komunikadu imprensa ne’ebé Agência TATOLI asesu, segunda ne’e.

Nia hateten, programa orsamentu daudaun ne’e la hanesan ho orsamentu ida uluk tanba orsamentu ne’e kada programa entaun sei kazu programa ne’e la hala’o ho di’ak orsamentu ne’e sei fila fali ba kofre estadu.

Membru Governu ne’e afirma liután formasaun ne’e hanesan bukae ba sira atu hatene ba futuru kuandu hala’o sira nia funsaun la ses-aan hosi dekretu lei Nú. 54 ne’ebé duadaun ne’e iha no mós dekretu lei sira seluk.

Nia dehan, bainhira sira hala’o ona knaar iha Munisipiu, Presidente Autoridade Munisipiu sira mak nu’udár reprezenta Primeiru Ministru iha nivél Munisípiu, tanba kompeténsia ne’ebé mak estipula ona iha dekretu lei Nú. 54 ne’e iha kompeténsia 19 ne’ebé mak ministériu sira-nia kompeténsia balun deskonsentra ona ba iha munisípiu no servisu diretór iha munisipál sira sei la relata direta ba sira-nia ministériu maibé relata de’it mak ba Prezidente Autoridade no Administradór Munisípiu.

Entretantu, iha formasaun ne’e Vise Ministru, Lino Torrezão apela ba formandu sira katak bainhira simu ona pose tenke la’o tuir orientasaun ne’ebé mak Ministeriu Administrasaun Estatal fó ona.

“kuandu sai ona Administradór tenke halibur komunidade sira tomak iha aspeitu ba desenvolvimentu iha nivél munisípiu no sei laharee ba kór, rasa, grupu no partidu,” nia apela.

Formasaun refere hala’o durante loron haat no Administradór na’in tolu ne’ebé tuir formasaun ne’e mak hanesan, Abel da Conceição hosi hanesan Administradór ba Munisípiu Aileu, Leovigildo Amaral Pereira Administradór Munisípiu Ainaro, no Francisco de Andrade hanesan Administradór Munisípiu Covalima.

Jornalista : Arminda Fonseca

Editór : Cancio Ximenes

HAKEREK NO HATÁN

Please enter your comment!
Please enter your name here