Ministra Saúde, Odete Maria Freitas Belo, observa direita servisu Ekipa Vijilánsia Ministériu Saúde foti amostra screening swab COVID-19 iha Aldeia Fatumea-Covalima. Imajen Tatoli/Eugénio Pereira

COVALIMA, 22 fevereiru 2021 (TATOLI)- Ministra Saúde, Odete Maria Freitas Belo, lori governu nian naran hato’o agradese ba povu Covalima ne’ebé hela iha liña fronteira ho voluntáriu partisipa iha programa teste swab COVID-19.

Ministra Odete Belo dehan, Estadu Timor-Leste deklara Estadu Emerjénsia da-sanulu hodi aplika serka sanitaria ba Munisípiu Covalima, Bobonaro no Oe-Cusse, nu’udar zona ne’ebé risku boot ba ameasa transmisaun lokál surtu COVID-19, tanba abitante sira kontinua tama ilegál maka’as tebes iha pontu entrada ho viziñu Indonézia.

Notísia Relevante : Atividade rekolla amostra teste swab COVID-19 liu ona alvu

Nia esplika, Governu halo foti amostra screening swab ba COVID-19 ba abitante sira hodi deteta sedu karik iha transmisaun lokál ba COVID-19 nune’e  Governu bele foti asaun hodi halo prevensaun emerjénsia salva povu nia vida hosi risku peste letál COVID-19.

“Mezmu sira hela iha fatin rurál ne’ebé risku, maibé hakarak partisipa iha teste screening ne’e atu  identifika mosu kazu ruma ita bele buka alternativa hodi salva ita nia populasaun,” Ministra Odete Belo hateten ba jornalista bainhira observa direita servisu Ekipa Vijilánsia Ministériu Saúde iha Aldeia Fatumea, domingu (21/02).

Governante ne’e agradese tanba amostra ba Munisípiu Covalima nian ne’ebé Governu presiza 700, maibé iha tempu loron-neen (6), ekipa rekolla liu tiha ona  alvu ho númeru 842.

Odete husu ba ekipa atu kontinua rekolla nafatin amostra ba abitante sira ne’ebé hela baliza iha Postu Administrativu Fatumea no Altu Lebos ne’ebé vizita direita Atambua- Indonézia.

“Tuir loloos ba Bobonaro ita presiza amostra screening 1.000 no Covalima 700, maibé númeru iha Covalima liu tiha ona, tanba ne’e ita sei kontinua rekolla nafatin iha aldeia no suku sira ne’ebé seidauk kompletu hodi rekolla hotu amostra para aprezenta ba Governu,” nia hateten.

Ministra Odete Belo  rasik halo vizita hodi haree ekipa vijilánsia sira nia servisu hosi Munisípiu Bobonaro no Covalima hodi motiva no fó suporta ba médiku sira ne’ebé halo servisu iha area risku bele iha korajen ajuda povu no Estadu hodi luta kontra COVID-19.

Iha fatin hanesan, Xefe Suku Fatumea, Júlio da Costa Nunes, agradese ba Governu hodi halo teste screening ba abitante sira para deteta sedu transmisaun lokál COVID-19 atu Governu bele foti medida hodi halo prevensaun.

Xefe suku ne’e rekoñese ninia abitante sira risku ba COVID-19 tanba povu sira hela besik kedas ho povu nasaun viziñu  no dala ruma halo kontaktu  fíziku direita bele lori moras tama Timor-Leste.

Autoridade suku ne’e mós preokupa, mezmu fronteira risku ba COVID-19, maibé to’o agora Ministériu Saúde rasik la fasilita karreta ambulánsia multi funsaun hodi koloka ba Postu Administrativu Fatumea para ajuda povu sira bainhira deteta ema ruma moras COVID-19  bele evakua urjente ba Covalima-Vila.

Notísia Relevante : Ministra Saúde promete rezolve problema bázika Postu Saúde Fatumea

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here