Administradór Munisípiu Aileu, Abel da Conceição halo juramentu. Imajen/Abekha Raihusar.

DILI, 23 fevereiru 2021 (TATOLI)—Ministériu Administrasaum Estatál (MAE), Miguel Pereira de Carvalho, hateten durante iha mandatu tinan lima (5) ne’e Administradór foun Munisípiu Aileu tenke promove no insentiva partisipasaun sívika konstrutiva iha Munisípiu Aileu.

Notísia Relevante: Governu husu Administradór Aileu asegura funsionamentu servisu administrasaun lokál

Ministru Administrasaun Estatal (MAE), Miguel Pereira de Carvalho . Imajen/Media MAE.

“Ha’u hakarak dezafia Administrador foun Munisípiu Aileu, atu konsentra nia matenek no abilidade hodi artíkula prosesu konstrusaun poder lokál demokrátiku Timor-Leste nian iha nível lokál. Tanba nu’udár Administradór foun tenke promove no insentiva partisipasaun sívika konstrutiva, basá iha ne’e maka ita bele hetan esénsia hosi poder lokál. Nune’e mós seidauk kompletu ita-nia governasaun lokál bainhira ita konsege de’it kria órgaun no servisu sira iha Administrasaun Lokál,” Miguel Pereira de Carvalho hateten iha nia diskursu bainhira fó tomada pose ba Adminitradór Munisípiu Aileu, Abel da Coceição, iha Salaun Administrasun Munisipál Aileu, ne’ebé Agência TATOLI asesu, tersa ne’e.

Nia dehan, atu atinje ida-ne’e tenke kumpre misaun no tenke garante atu populasaun lokál sira bele partisipa hodi envolve-aan iha prosesu dezenvolvimentu no prosperiedade.

Adminitradór Munisípiu foun Aileu, nia hateten, tenke asegura atu populasaun sira bele esklaresidu kona-ba kompleksidade governasaun nian, hodi sira bele hatuur estratéjia hirak nesesáriu atu bele ultrapasa hamutuk obstákulu sira-ne’ebé identifika ona.

“Ita hakarak atu populasaun hosi munisípiu ida-idak bele hamutuk hakaas-aan atu promove dezenvolvimentu. Sidadaun sira iha munisípiu ida-idak bele hasees-aan hosi divisionizmu ne’ebé la tulun ita. Bainhira ita hakarak hala’o prosesu dezenvolvimentu iha nível munisípiu no iha nível nasionál ka país tomak, divisionizmu lori de’it rezultadu negativu mai dezenvolvimentu no hakarak de’it atu enfrakese ita-nia nasaun,” nia hateten.   

Oinsá bele hamenus divisionizmu iha Munisípiu, nia sujere, ideia ida mak bainhira atu formula planu dezenvolvimentu munisipál nian ida, buka hakaas-aan atu buka dalan diálogu hodi bele hetan konsensu katak konsensu tenke reflete vontade komun atu identifika no buka solusaun ba problema ne’ebé mosu iha populasaun nia leet.

“Atu hetan Konsensu, la’os buat fasil ida maibé presiza pasiénsia no abnegasun (fuan boot). Bainhira ita fahe ita-nia vontade di’ak ho sidadaun sira, atu sira mós bele banati tuir politika Governu nian, mak ida-ne’e ita presiza kadi kakutak hodi hasoru moris loro-loron nian,” Miguel haktuir.

Nu’udár reprezentante Governu iha Munisípiu, tuir nia, tenke fuan boot hodi buka hatuur estratéjia hirak ne’ebé populasaun sira rekuñese hanesan estratéjia loos nian, atu nune’e bele fasilita empeñu iha implementa programa Governu nian sira.

“Ita-nia meta finál mak kumpre ita-nia mandatu atu konkretiza objetivu hirak hosi dezenvolvimentu. Ho dezenvolvimentu mak bele fasilita hamenus kestaun hirak ita hasoru hodi bele hetan solusaun ba problema balun ne’ebé sira hasoru iha moris loro-loron nian,” nia subliña.  

Tanba ne’e, nia dezafia komponente hotu iha Munisípiu Aileu ho lideransa Administradór foun Munisípiu Aileu nian, hodi implementa prinsípiu boa governasaun nian iha atuasaun Administrasaun Lokál Estadu iha Munisípiu Aileu. 

“Boa Governasaun signifika katak prosesu halo desizaun no implementasaun ba polítika no atividade sira ho maneira ida-ne’ebé efetiva, efisiente, lejítima no justa. Boa Governasaun asegura atu prosesu governasaun prenxe duni nesesidade povu Timor-Leste nian no promove sira-nia direitu,” nia dehan.

Boa governasaun ne’e, nia dehan, importante no rekursu hotu-hotu ne’ebé Estadu uza pertense hanesan ba sidadaun hotu-hotu Timor-Leste nian. Ne’eduni, Estadu tenke uza nia rekursu atu benefísia ema hotu iha Timor-Leste, tanba boa Governasaun asegura atu rekursu sira sei uza hodi benefísia povu tomak iha Timor-Leste.

“Ha’u laran metin katak ho matenek no esperiénsia ne’ebé iha, Administradór foun Munisípiu Aileu nian bele konta ho apoiu hosi populasaun Munisípiu Aileu nian, apoiu hosi lideransa komunitáriu sira no mós komponente hotu iha Aileu hodi bele dezenvolve Munisípiu Aileu,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here