Livru ne'ebé MS prepara ba inan-isin rua sira. Imajen Tatoli/Eugénio Pereira

COVALIMA, 20 fevereiru 2021 (TATOLI)- Durante  janeiru to’o dezembru 2020, bebé hamutuk na’in-91 maka moris iha Sentru Saúde Postu Administrativu Fatumea, Munisípiu Covalima, ho kondisaun saúde inan ho oan di’ak hotu.

Xefe Sentru Saúde Komunitáriu Fatumea, Agostinho Amaral. Imajen Tatoli/Eugénio Pereira

Xefe Sentru Saúde Komunitáriu Fatumea, Agostinho Amaral ba Agência TATOLI iha Sentru Saúde Fatumea, sábadu ne’e, informa bebé na’in-91  ne’e kompostu  hosi bebé-feto na’in-42 no mane na’in-50.

Maioria labarik sira moris ho nutrisaun di’ak, tanba inan isin-rua sira durante fulan sia halo konsulta ativu iha sentru saúde no konsumu ai-han ho nutrisaun di’ak.

Durante ne’e Sentru Saúde ne’e mós hetan apoiu doasaun hosi Governu Austrália liuhosi “Programa Liga Inan” ne’ebé  ajuda sosializa informasaun ba inan sira oinsá prepara aan kuidadu bebé hahú hosi isin-rua to’o partu.

Programa Liga Inan ne’e ajuda mós feto maluk sira hodi kuidadu sira-nia vida no labarik sira hodi redús mós kazu mortalidade inan no oan sira.

“Ami apresia tebes ho ajuda ida hosi Governu Austrália liuhosi Programa Liga Inan,” nia hateten.

Tuir nia, dala ruma inan isin-rua sira ne’ebé hela dook hosi sentru saúde, ekipa médiku sempre kontaktu hodi vizita direita ba sira-nia uma hodi fó partu hodi bele salva inan no oan sira.

Hafoin partu, ekipa médiku sira mós sempre konsola inan sira durante fulan tolu atu fó susu ba labarik sira aumenta sira-nia nutrisaun. Alende ne’e, konsola mós inan sira kuidadu bebé no ativu lori bebé ba vasina dala-lima molok bebé tinan-ida no vasina iha fulan 18 ho vasina dala ikus baihira labarik halo tinan neen.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here