Primeiru-Ministru, Taur Matan Ruak. Imajen TATOLI/Egas Cristovão

DILI, 18 fevereiru 2021 (TATOLI)-Governu liuhosi Komisaun Nasionál Prevensaun COVID-19 hosi Ministériu Saúde (MS), hahú halo teste iha loron 15 to’o 25 fevereiru, ba sidadaun hamutuk 400-resin iha munisípiu Bobonaro no Covalima.

“Ita-nia Ministériu Saúde halo levantamentu dadus liuhosi teste masál hodi foti amostra, ne’ebé tuir informasuan horiseik  teste ema iha Covalima hamutuk 100-resin no Bobonaro ba ema hamutuk 300-resin,” Primeiru-Ministru, Taur Matan Ruak, hateten hafoin enkontru semanál ho Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pité, kinta ne’e.

Teste masál no foti amostra atu hatene no haree iha serteza karik iha kontájia komunitária iha iha área ne’ebé besik liu fronteira terrestre ho nasaun viziñu Indonézia no risku ba entrada ilegál.

Lockdown ba munisípiu rua ne’e ramata iha loron 03 marsu, maibé iha medida atividade levantamentu dadus atu sertifika laiha kontájia komunitária, tanba ne’e bainhira halo levantamentu sedu no haree la nesesáriu, lockdown ne’e bele la to’o loron 03 marsu,” PM Taur akresenta.

MS foti ona amostra no lori ba laboratóriu hafoin hasai rezultadu, nune’e bele hatene kondisaun iha munisípiu rua ne’e.

“Ita-nia númeru kazu aumenta liuhosi entrada ilegál sira ne’ebé des-kontroladu oituan no tama iha komunidade sira-nia le’et, ne’ebé ita presiza esforsu atu satán COVID-19,” Xefe Governu enkoraja.

Iha sorin seluk, Governu sei solisita Prezidente Repúblika atu dekreta tan Estadu Emerjésia tanba númeru kazu pozitivu COVID-19 aumenta.

“Ha’u informa mós ba Prezidente Repúblika kona-ba Estadu Emerjénsia ne’ebé Konsellu Ministru deside ona atu fulan oin ne’e halo estensaun,” nia hatutan.

Nune’e,  Xefe Governu ne’ebé hanesan mós Ministru Interiór asina ona atu fronteira terrestre loke kada loron 15 no sei iha renovasaun.

“Ita kontinua taka, ita agora autoriza tama de’it sasán maibé ema la tama, exeptu kazu emerjénsia ruma hanesan moras no nesesidade importante ruma mak ita autoriza,” Xefe Ezekutivu esplika.

Maski nune’e, nia rekoñese fronteira terrestre ho distánsia kilómetru 100, ne’ebé atu asegura la fasil hodi kontinua fó biban ema tama liu dalan ilegál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here