Adjuntu Komisariu CAC ba Asuntu Prevensaun no Sensibilizasaun, Luis de Oliveira Sampaio. Imajen Tatoli/Egas Cristovão.

DILI, 20 fevereiru 2021 (TATOLI)—Comissão Antí Corrupção (CAC) sei aplika uluk  rejime deklarasaun riku-soin  no bens ba uluk ministéiru sira ne’ebé konsidera estratéjiku ho instituisaun ne’ebé servisu  iha área kolesaun reseita.

Notísia Relevante: CAC sei aplika rejime deklarasaun rikusoin ba uluk instituisaun balun

Adjuntu Komisáriu Comissão Antí Corrupção ba Asuntu Prevensaun no Sensibilizasaun, Luis Oliveira Sampaio, hateten CAC seidauk define mapeamentu atu aplika rejime deklarasaun riku-soin no bens ba uluk instituisaun Estadu hira tanba sei iha diskusaun.

“Tuir preferénsia CAC sei haree aplika uluk ba ministéiru sira-ne’ebé konsidera estratéjiku ho instituisaun Estadu ne’ebé servisu iha área hodi lori rendimentu ba Estadu hanesan Ministéiru Finansa, Alfandega, Eletrisidade de Timor-Leste Empreza Públika (EDTL-EP), Terras no Propriedade, Migrasaun ho sira seluk,” Luis Oliveira Sampaio hateten ba Agência TATOLI iha nia servisu fatin, sesta ne’e. 

Nia hateten, CAC sei realiza semináriu nasionál ida iha segunda (22/02) semana oin hodi konvida diretór rekursu umanu iha instituisaun Estadu hotu atu halo introdusaun ba servisu arolamentu ninia mekanizmu no oinsá fornese informasaun kona-ba lista kargu xefia ida-idak ba iha CAC.

“Hafoin semináriu ne’e, CAC sei halo kompilasaun hodi ida-ne’e mak sei identifika área ne’ebé sai alvu ba prosesu mapeamentu,” Luis Oliveira Sampaio hateten.

Nia hatutan, lei Medida Prevenção no Combate Corrupção (MPCC) sei vigor iha loron 22 favereiru 2021 no hosi ne’e ba oin ho prosesu arolamentu sei to’o iha 31 jullu tinan ne’e, dirasaun rekursu umanu hosi instituisaun ida-idak prepara lista identidade pesoál kada kargu xefia ida-idak hodi fornese ba CAC, hafoin CAC sei halo verifikasaun hodi hahú deklara riku-soin.

Nia informa, prosesu preparativu kona-ba formuláriu, dadaun ne’e CAC diskute hela ho Tribunál Rekursu iha faze final.

Luis Oliveira hateten, CAC iha difikuldade boot ho rekursu  ba implementasaun rejime deklarasaun riku-soin no bens hosi lei foun MPCC tanba kompleksu tebes. Laiha dirasaun propriu ida iha ema tékniku preparadu atu ka’er responsavilidade maibé CAC tenta masimiza esforsu halo preparativu sira hodi ajusta konsolida esperiénsa atu hatán ba ejizensia hosi lei refere.

Nia infroma, CAC mós iha planu atu halo rekrutamentu ba pesoál na’in-25 iha tinan ne’e hafoin sei tuir formasaun internál no estájiu durante tinan ida, hafoin sei koloka ba unidade foun rejime deklarasaun hodi apoiu liután servisu sira.

Notísia Relevante: Formuláriu ba kargu xefia deklara rikusoin prontu ona

Jornalista: Nelson de Sousa

Editór: Cancio Ximenes

HAKEREK NO HATÁN

Please enter your comment!
Please enter your name here