Diretór DNPDML,, Abel da Conceição. Imajen TATOLI/Egas Cristovão.

DILI, 19 fevereiru 2021 (TATOLI)—Secretário de Estado para a Comunicação Sosiál (SECOMS) liuhosi Diretór Diresaun Nasionál Promosaun no Dezenvolvimentu Mídia Lokál (DNPDML), Abel da Conceição, hateten tinan ne’e SECOMS sei harii rádiu komunidade ba ema ho defisiénsia sira iha Timor-Leste

Nia hatutan, estabelesimentu rádiu komunidade ne’e SECOMS sei koopera ho Asosiasaun Defisiente Timor-Leste (ADTL) no sei aloka orsamentu hamutuk rihun $14.

Notísia Relevante: SECOMS apoiu rihun $8-resin ba rádiu komunidade 16

“Tinan ida ne’e orsamentu ne’ebé ita aloka atu harii rádiu komunidade ba ita-nia maluk sira liuliu ema ho defisiénsia sira liuhosi Asosiasaun Defisiente Timor-Leste (ADTL) ho montante orsamentu rihun $14,” Abél da Conceição hateten ba Agência TATOLI, iha salaun ANC, Mercado Lama, Dili, sesta ne’e. 

Abel da Conceição afirma, orsamentu rihun $14 ne’ebé SECOMS aloka atu harii rádiu komunidade ba ema ho defisiénsia sira-ne’e, la’ós foti hosi fundu transferénsia públika.

Nia informa, daudaun ne’e Timor-Leste iha rádiu komunidade hamutuk 16 no tinan ida-ne’e Governu aloka tan osan atu estabelese rádiu ba maluk defisiente sira iha Timor-Leste.

“Rádiu ida ne’e la’os espesífisu ba tipu defisiente ida de’it maibé ba tipu defisiente hot-hotu. Ita oferese rádiu komunidade ida ba sira no sei funsiona iha tinan ida-ne’e nia laran,” nia informa.

Diretór ne’e haktuir, orsamnetu ne’ebé aloka atu sosa ekipamentu rádiu no halo stúdiu ho ekipamentu sira-ne’ebé mak iha kualidade, no tinan ne’e haree uluk mak oinsá estabelese rádiu refere.

“Tinan oin mai mak ita haree fali aumenta osan ita bele oferese ekipamentu sira-ne’ebé mak kualidade no di’ak ba ita-nia maluk defisiente sira. Maibé, tinan ne’e, ita hare uluk mak oinsá estabelese uluk rádiu ne’e lai. Rádiu ba maluk defisiente sira ne’e seidauk hatene sá fulan mak atu estabelese, tanba daudaun ne’e sei iha prosesu aprovizionamentu. Ne’ebé, hein fulan rua ka tolu tan, iha ona ekipamentu mak ita-nia tékniku sira preparadu atu monta rádiu,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here