Reprezentante SEKOMS no Atual Diretór DNPDM, , Abel da Conceição, Asina Kontradu fundu transferensia publika ho Rádiu Komunidade munisípiu 12 inklui RAEOA, iha salaun ANC, Caicoli, sexta (19/02). Imajen TATOLI/Egas Cristovão.

DILI, 19 fevereiru 2021 (TATOLI)–Secretário de Estado para a Comunicação Sociál (SECOMS) liuhosi Dirasaun Nasionál Promosaun Dezenvolvimentu Mídia Lokál (DNPDML), apoiu fundu transferénsia públika 50% ba rádiu komunidade 16 iha Timor laran tomak ho durasaun fulan neen.

Diretór Dirasaun Nasionál Promosaun Dezenvolvimentu Mídia Lokál, Abel da Conceição, hateten orsamentu ba tinan ne’e SECOMS aloka ba rádiu komunidade 16 iha Timor laran tomak ho montante rihun $8 maibé sei halo transferénsia ba faze rua.

Notísia Relevante: Diretór CRC: Parabéns ba loron mundiál rádiu

Diretór CRC SEKOMS, Abel da Conceição. Imajen TATOLI/Egas Cristovão

“Orsamentu ne’ebé tinan ne’e ita aloka ba Dirasaun Nasionál Promosaun Dezenvolvimentu Mídia Lokál (DNPDML), montante rihun $70,820, entaun aloka fali ba kada rádiu komunidade ida hetan rihun $8-resin. Entaun, hosi montante ne’e ita fó ba kada jestór rádiu rihun $4,46 ho nia pursentu 50. Osan ne’ebé ita fó ba rádiu komunidade, fó dala rua. Faze dahuluk, hahú hosi janeiru-juñu no faze daruak nian ita sei fó hahú hosi juñu-dezembru,” Abel da Conceição hateten liuhosi nia diskursu iha serimónia asina nota transferénsia públika ho rádiu komunidade 16, iha Salaun ANC, Mercado Lama, Dili, sesta ne’e.

Nia hatutan, tinan ne’e SECOMS aloka osan ba rádiu komunidade 16 iha Timor laran tomak kompara ho tinan antes ne’e, osan montante kiik uitoan. Tanba, tuir nia, tinan ida ne’e DNPDML halo programa boot tolu mak hanesan kontinua fó asisténsia ba rádiu komunidade hanesan agora daudaun halo transferénsia públika ne’e, no tinan ne’e mós inísia ba implementasaun mídia lokál no programa Naroman ba Suku.

“Entaun ligasaun programa tolu ne’e tutela hotu mai Dirasaun Nasionál Promosaun Dezenvolvimentu Mídia Lokál, maibé la implika ho orsamentu ne’ebé mak boot. Osan ho de’it rihun $70, 464.00, atu ezekuta ba programa tolu ne’e. Entaun, tinan ida-ne’e alokasaun osan ba rádiu komunidade nian tenke tun uitoan tanba alokasaun mós kiik,” nia dehan.

Tanba ne’e, nia husu ba jestór rádiu komunidade hotu katak maske osan ne’ebé aloka ne’e ho montante kiik maibé jestór sira tenke jere ho di’ak.

“Maluk jestór sira tenke halo jestaun ho didiak ba orsamentu $4,464.00. Tanba uitoan ka barak, ida-ne’e mak Governu fó ba ita durante fulan neen nia-laran. Tanba ne’e, ha’u fiar katak ita-boot sira sei jere ho di’ak tuir duni ba programa sira-ne’ebé imi planea ona,” nia hateten.

Nia esplika, programa sira-ne’ebé sei implementa hosi orsamentu rihun $8 ne’e iha programa lima mak hanesan, produsaun notísia lokál, notísia online, produsaun ba Talk Show, produsaun teatru ka drama no produsaun mensajen badak sira.

Rádiu komunidade 16 ne’ebé ohin asina kontratu fundu transférensia públiku 50% mak hanesan Rádiu Komunidade Tokodede Liquiça, Rádiu Komunidade Comoro, Rádiu Komunidade Cova Taroman Suai, Rádiu Komunidade Atoni Lifau Oé-Cusse, Rádiu Komunidade Vox Populi Lospalos, Rádiu Komunidade Mauloko Maubisse, Rádiu Komunidade Manukoko Atauro, Rádiu Komunidade Ili-Wai Manatuto, Rádiu Komunidade 1912 Same, Rádiu Komunidade Lian Matebian Baucau, Rádiu Komunidade Kolelemai Sahe Bucoli, Rádiu Komunidade Rai-Husar Aileu, Rádiu Komunidade Povu Viqueque, Rádiu Komunidade Kafe Ermera, Rádiu Komunidade Lian Tatamailau Ainaro, no Rádiu Komunidade Maliana.

Jornalista: Arminda Fonseca

Editór: Cancio Ximenes.

HAKEREK NO HATÁN

Please enter your comment!
Please enter your name here