Prezidente Asosiasaun Independente Rekolla Dadus Veteranu (ARDV), José Dias Guterres 'Loi Mali'. Imajen TATOLI/Evaristo Soares Martins.

DILI, 19 fevereiru 2021 (TATOLI)—Prezidente Asosiasaun Independente Rekolla Dadus Veteranu (AIRDV), José Dias Guterres ‘Loi Mali’, hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, hodi informa kona-ba ema sira-ne’ebé falsifika dadus veteranu nian iha territóriu nasionál.

Notísia Relevante: Lista veteranu falsu na’in-500-resin ba ona Ministériu Públiku

“Prezidente Parlamentu Nasionál apoia inistiativa ne’e no apoia lori ema sira-ne’ebé falsifika dadus veteranu nian ne’e ba Ministériu Públiku no Tribunál. Ami halo ida-ne’e tanba instituisaun haat mak apoia ami hanesan Prezidente Repúblika, Prezidente Parlamentu Nasionál, Primeiru Ministru, Prezidente Tribunál Rekursu no Ministériu Públiku. Ami rekolla ona ema 500 mak falsifika no halo ona interrogatóriu iha Ministériu Públiku, hein de’it sira ba hatán iha tribunal,” Loi Mali informa ba jornalista sira, iha varanda prinsipál Parlamentu Nasionál, sesta ne’e.

Nia dehan, hosi ema na’in-500 ne’e mai hosi munisípiu 12 inklui Rejiaun Administrativa Espesiál Oé-Cusse Ambeno (RAEOA).

“Hosi ema na’in-500 ne’e barak liu hosi Same ne’ebé simu tiha ona osan Estadu nian. Kona-ba sira-nia kulpa só tribunal mak bele hatene. Sasin hodi hatodan ema sira-ne’e, iha,” nia akresenta.

Nia haktuir, veteranu falsu sira-ne’e la halo funu maibé tanba família mak fasilita entaun sira-nia naran tama iha lista veteranu nian.

“Tanba de’it partidu, tanba de’it kolega, entaun nia rasik asina nia surat hodi ba eskalaun 8-14 hodi manán osan montante $200-resin,” nia informa. 

Asosiasaun Independente Rekolla Dadus Veteranu deteta kazu veteranu falsu ne’e tanba familiarizmu no partidarizmu.

Prezidente AIRDV ne’e dehan, iha Timor laran korrupsaun boot liu mak falsifika dadus veteranu nian ho númeru boot liu.

“Estadu gasta osan biliaun kada tinan ba ema veteranu, ema 500 ne’e la’ós veteranu asli,” nia dehan.

Notísia Relevante: MACLN identifika tan dokumentu veteranu falsu 3000-resin

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here