Koordenadór Cesta Bázika, Osório Florindo. Imajen TATOLI/Arminda Fonseca.

DILI, 18 fevereiru 2021 (TATOLI)—Koordenadór Cesta Bázika, Osório Florindo, hateten semana oin Governu sei halo lansamentu ba Progaram Cesta Bázika iha Rejiaun Administrativa Espesiál Oé-Cusse Ambeno (RAEOA).

Notísia Relevante: Orsamentu la tranzita, ko’a 7% kada ministériu apoiu Cesta Bázika

Osório Florindo hatutan, lansamentu ne’e foin mak hala’o tanba situasaun surtu COVID-19 ne’ebé serku komunidade RAEOA, no tuir planu produtu lokál sira ne’ebé atu distribui ba komunidade iha RAEOA tenke lori hosi Dili tanba produtu lokál RAEOA nian la sufisiente. 

“Ha’u hanoin, semana oin Governu sei halo lansamentu ba programa cesta bázika iha Rejiaun Administrativa Oé-Cusse Ambeno (RAEOA). Tanba, hanesan ita hotu hatene katak durante ne’e situasaun COVID-19 serku hela sira no produtu lokál ne’ebé sei distribui ba komunidade iha REAOA ne’e, hotu-hotu sei lori hosi Dili tanba Oé-Cusse nia produtu lokál la sufisiente,” Osório Florindo hateten ba jornalista sira liuhosi konferénsia imprensa iha Salaun Forum Organizasaun Naun Governamenál Timor-Leste, Caicoli, Dili, kinta ne’e.

Aleinde ida-ne’e, nia informa, progresu cesta bázika ne’ebé durante ne’e distribui ba komunidade iha munisípiu 12 ne’e, daudaun ne’e atinji ona 60%.

“Distribisaun Cesta Bázika ba munisípiu 12 hotu-hotu la’o hela no ita distribui ona mais 800 mil no atinji ona 60%, tanba implementa hosi Sekretáriu Estadu Kooperativa (SEKoop), Ministériu Turizmu Komersiu no Industria (MTCI), Ministériu Agrikultura no Peska (MAP), no Sentru Lojístiku Nasionál (SLN),” Osório Florindo hateten.

Koordenadór ne’e hatutan, progresu distribuisaun ne’e hetan fallansu tanba Governu tarde halo pagamentu ba kompañia fornesedór sira.

“Maibé, Governu konsiente situasaun ida-ne’e no agora daudaun Ministériu Finansa mobiliza oinsá prosesu pagamentu ne’e lais uitoan, atu implementadór sira bele aselera prosesu pagamentu ne’e to’o 28 fevereiru. Populasaun balun ne’ebé seidauk simu programa cesta bázika ne’e tenke hetan hotu. Tanba, programa cesta bázika ne’’e universal no ema hotu iha direitu tenke simu,” koordenadór ne’e hateten.

Nia dehan, ba suku no aldeia sira iha munisípiu balun ne’ebé to’o agora seidauk simu cesta bázika, tanba aldeia no suku balun kondisaun estrada ladi’ak entaun difikulta ba prosesu distribuisaun cesta bázika ba komunidade sira.

“Maibé, ida-ne’e la difikulta ajente implementadór sira atu kontinua tanba Governu aloka ona osan ba programa cesta bázika. Povu hotu-hotu iha diretu atu hetan benefísiu hosi Cesta Bázika ida-ne’e,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here