Prezidente Tribunál Rekursu, Deolindo dos Santos. Imajen Tatoli/Egas Cristovão

DILI, 17 fevreiru 2020 (TATOLI)—Prezidente Tribunál Rekursu (PTR), Deolindo dos Santos infroma, durante 2019 to’o inísiu 2020, tribunál sira halo julgamentu ba kazu krime sira no violénsia doméstika mak aas liu iha Timor-Leste.

“Husi kazu sira ne’ebé tribunál simu, prosesu ne’ebé dominante ba krime maka krime violénsia doméstika mak sei aas tebes,” dehan Prezidente Tribunál Rekursu (PTR), Deolindo dos Santos, ba jornalista sira hafoin halo soru-mutuk ho Xefe Estadu iha Pálasiu Prezidente Nicolau Lobato, Birru-Pite, Dili, ohin.

Nia hatutan, kazu ne’ebé okupa tuir mai maka krime kontra vida no kontra propriedade. Kona-ba kazu sivíl nian, Prezidente Tribunál ne’e hateten, sei domina husi kazu kontra propriedade ne’ebé sei iha relasaun ho kontratu sira ne’ebé mak iha.

“Ida-ne’e akontese tanba antes ne’e ema la komprende. Maibé, ikus-ikus ne’e, ladún iha ona disputa kona-ba rai no uma. Tanba, ema komesa komprende ona entaun sira hotu-hotu dehan katak duké baku malu, di’akliu rejistu iha tribunál maka deside,” nia esplika.

Nakait ba kazu hirak-ne’e, Prezidente Tribunál Rekursu justifika ho dadus liuliu kazu sira ne’ebé durante ne’e julga iha tribunál sira hahú husi númeru aas liu to’o númeru kii’k liu.

“En prrinsípiu, iha evolusaun, la’ós ita ko’alia de’it maibé ne’e konkretu. Iha 2019 to’o inísiu 2020, to’o agora daudaun, ita iha prosesu kazu 300 resin. Ohin, ha’u sai mai ne’e, prosesu kazu pendente ne’ebé iha Tribunál Rekursu, husi 300 resin ne’e hela de’it kazu krime 54. Iha mós kazu sivíl 90 resin no prosesu hela de’it kazu 11 ne’ebé pendent,e” nia esplika.

Nia rekoñese, iha Tribunál Dili enfrenta difikuldade tanba ne’e ninia kazu krime ne’ebé pendente hamutuk 2.05 no kazu sivil 1000.

Aleinde ne’e, nia informa, iha Tribunál Suai kazu krime hamutuk 900 resin no kazu sivíl iha 200 resin.

Iha Tribunál Baucau, nia hateten, kuaze hanesan de’it tanba sira iha kazu krime pendente 200 resin inklui kazu sivíl mós pendente 200 resin.

Entretantu, iha Tribunál Oé-Cusse iha kazu krime pendente hamutuk 200 resin no kazu sivíl ne’ebé pendente hamutuk 200 resin.

“Ne’e mak dadus ne’ebé ita iha, até ohin nian. Ne’e signifika, ita halo redusaun ne’ebé la’ós perfeitu maibé redusaun ne’ebé signifikadu tebe-tebes ba kazu pendente sira iha tinan hirak liubá,” nia esplika.

Jornalista : Cipriano Colo

Editór       : Cancio Ximenes

INFORMASAUN

HAKEREK NO HATÁN

Please enter your comment!
Please enter your name here