Ministru Asuntu Parlamentár no Komunikasaun Sosiál, Francisco Jerónimo. Imajen TATOLI/Egas Cristovão

LIQUIÇÁ, 16 fevereiru 2021 (TATOLI)—Ministériu Asuntu Parlamentár no Komunikasaun Sosiál (MAPKOMS) iha ona planu, tinan ne’e atu harii torre neen ba Rádiu Televizaun Timor-Leste, Empreza Públika (RTTL, E.P), nune’e populasaun tomak bele asesu informasaun ho di’ak.

Ministru Asuntu Parlamentár no Komunikasaun Sosiál, Francisco Jerónimo, hateten daudaun dijitalizasaun sistema transmisaun RTTL foin kobre munisípiu Liquiçá, Dili, enkuantu ba Ermera, Bobonaro no Aileu rohan de’it mak hetan asesu ho instalasaun set box televizaun hamutuk 30.000.

“Torre foin iha Biterlau iha Fatuahi, Kutulau iha Bazartete no torre sentrál iha Caicoli, entaun abanje de’it iha área sira ne’e de’it. Maibé tinan ne’e, ministériu kontinua harii tan torre neen no tinan oin instala tan set box 30.000, atu nune’e bele abaranje ba munisípiu Baucau, Viqueque, Lautém Ainaro, Bobonaro rohan no Ermera hotu,” Ministru Francisco informa ba Agência TATOLI, iha ámbitu lansamentu dijitalizaun transmisaun RTTL, E.P, iha suku Guiço, postu administrativu Maubara, munisípiu Liquiçá, tersa ne’e.

Notísia relevante: Lansa sistema dijitalizasaun, PM Taur enkoraja RTTL,E.P dezenvolve-an

Nune’e, tinan tuir mai kontinua instala torre neen tan, atu nune’e inklui mós ho Rejiaun Administrativa Espesiál Oé-cusse Ambeno (RAEOA).

“Sira ne’e hotu ona maka bele dehan finaliza instalasaun torre iha Timor-Leste ne’ebé bele abranje ona dijitalizasaun 100%,” nia akresenta.

Tuir governante ne’e, ba oin MAPKOMS sei kria polítika hodi dezenvolve di’ak liután sistema dijitalizasaun transmisaun multimedia terrestre iha RTTL.

“Konseitu dijitalizasaun agora la’o namanas hela, tanba ne’e dezenvolvimentu ne’e to’o tinan tolu ba oin. Tuir orientasaun Primeiru-Ministru nian, to’o tinan 2024 pelu menus ninia prosesu dijitalizasaun ne’e atinje ona 100%,” nia hatutan.

Maibé antes ne’e, parte ministériu sei hahú uluk prepara kondisaun, tanba RTTL ida agora hosi sistema analog ba dijitál.

“RTTL hahú halo adapatasaun daudaun ona ho materiál ne’ebé hosi bain-bain ba High Definition (HD), entaun ne’e hatudu ona katak sira mós presiza prepara no hadi’a-an nafatin hodi nune’e bele atinje ita hotu nia mehi,” nia akresenta.

MAPKOMS komprometidu nafatin hambrik iha RTTL no Agência TATOLI atu kria kondisaun.

“Ita bele sai profisionál transforma an sai di’ak liu iha futuru hanesan rádiu no televizaun ne’ebé maka povu Timór sira fó fiar,” nia enkoraja.

Entertantu, sistema dijitalisaun RTTL, E.P sei oferese kanál 22, ne’ebé kanál 13 ba área desportu, edukasaun no seluk tan enkuantu kanál sia sei iha prosesu nia laran.

Jornalista: Natalino Costa

Editora: Julia Chatarina

2 KOMENTÁRIU

  1. Harii de’it Torres 6 precisa tinan ida..ne’e servisu demasiadu lento..no la-hatene plano servisu karik?sa tan servisu iha area teknolojia nian..harii torre 6 precisa loron 6 ka semana 6 de’it karik di’ak..agora era teknologia nebe halo servisu ho lalais labele servisu manumaten..nudar cidadaun triste rona no haree plano hanesan ne’e..kuitado.

HAKEREK NO HATÁN

Please enter your comment!
Please enter your name here