DILI, 16 fevereiru 2021 (TATOLI)—Ministru Administrasaun Estatál (MAE), Miguel Pereira de Carvalho, hateten hosi sidadaun ka abitante 378 ne’ebé hela iha Sidade Dili ne’e loro-loron sira prodús lixu kilógrama 0.7 no tonelada 250 kada loron.

Notísia Relevante: Konstrusaun moru ba lixeiru Tibar iha ona prosesu tenderizasaun

Miguel Pereira de Carvalho informa, oras ne’e autoridade Munisipál Dili mak responsável ba jestaun lixu iha Munisípiu Dili ho rekursu ne’ebé natoon, tanba iha Postu Administrativu Cristo Rei, Dom Aleixo, Metinaro, Nain Feto, Vera Cruz eseptu Atauro ne’e iha pesoál limpeza ezgostu kada postu administrativu na’in-35 kompleta ho kamioneta ida.

Nia subliña, pesoál hirak ne’e hosi tempu ba tempu hamoos ezgostu ne’e dezde uluk kedas bainhira Ministériu Obra Públika (MOP) deskonsentra ba munisípiu sira atu bele hamoos ezgostu.

“Neste momentu dadus ne’ebé mak iha Sidade Dili ne’e kada sidadaun idak-idak prodús lixu kuaze kilógrama 0.7 kada loron ida ho abitante ne’ebé mak agora ne’e atinje ona rihun 376, abitante iha Sidade Dili ne’e prodús lixu 250 tonelada kada loron,” Miguel Pereira de Carvalho esplika asuntu ne’e hafoin simu interpelasaun hosi deputadu sira kona-ba jestaun lixu iha Sidade Dili iha Parlamentu Nasionál, tersa ne’e.

Governante ne’e akresenta, hosi lixu tonelada 250 kada loron ne’e só 55% mak transporta ba lixeiru Tibar, entertantu 45% ne’e ba hotu iha valeta no ba hotu tasi, maske Autoridade Munisípiu Dili iha kamioneta 49 ne’ebé kada loron tula lixu.

“Planu Governu nian iha ona maibé iha hela prosesu konkursu atu bele kontrata operadór na’in-rua hodi tula lixu iha Dili Leste no Dili Oeste no mós iha operadór ida halo tranformasaun iha lixeiru Tibar ba iha ateru kontroladu,” nia esplika ba reprezentante povu sira.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here