Atividade joven na'in-tolu bainhira hili sasán uzadu hanesan kalen no besi-aat sira-ne’ebé soe iha lixeiru Tibar, sesta (5 /2/2021). Imajen Tatoli/Antonio Goncalves.

DILI, 15 fevereiru 2021 (TATOLI)—Xefe Departamentu Reziduo Sólidu Urbana (RSU), João do Carmo de Fátima, hateten konstrusaun moru ba lixeiru Tibar, agora daudaun iha ona prosesu tenderizasaun.

Notísia Relevante: FDCTL-komunidade Libaulelo lamenta lixu iha Tibar

Kona-ba konstrusaun ba moru lixeira Tibar, nia dehan, sei iha faze tenderizasaun nia-laran. Tanba ne’e, presiza tempu mak define sé mak sei liu ka manan iha tenderizasaun ne’e.

“Ita seidauk hatene. Tanba, buat hotu sei iha prosesu tenderizasaun nia-laran. Tanba ne’e ita seidauk define, empreza ida-ne’ebé mak manan. Maizumenus iha fulan ida-ne’e nia-laran, ita bele finaliza ona prosesu ne’e hotu,” João do Carmo de Fátima hateten ba Agência TATOLI iha nia knaar fatin, Colmera, Dili, segunda ne’e.

Nia hateten, hein katak iha tinan ne’e bele hetan ona empreza ne’ebé kualifikadu duni hodi halo konstrusaun lixeiru Tibar ne’e. Nia informa, durante ne’e parte MAE simu ona empreza hamutuk 15 no hosi empreza hirak ne’e balun hosi internasionál.

Maibé, ho asuntu refere, Xefe RSU hateten, Timor-Leste iha ona kuadru legál ida mak lei númeru 2/2017 ne’ebé mak ko’alia kona-ba jestaun reziduo sólidu urbana no rezolusaun Governu 30/2016 ne’ebé mak ko’alia kona-ba planu no prosesu oinsá halo konstrusaun moru ba lixeiru Tibar, inklui mós ba jestaun tomak lixu iha Dili laran.

Notísia Relevante: Tanba Lixu, Governu Simu Krítika

Tanba ne’e, nia dehan, presiza kuadru legál hodi fó dalan ba prosesu konstrusaun moru hodi asegura komunidade sira-nian saúde hosi importasaun lixu hosi Munisípiu Dili no Ermera nian.

“Ita-nia komunidade ne’ebé mak hela iha Suku Tibar liuliu sira ne’ebé mak hela besik liu ba lixeiru Tiabr afetadu tebes ba ahi-suar hosi ema sunu foer no foer nia iis sira iha ne’ebá. Tanba ne’e mak Governu agora daudaun iha ona prosesu nia-laran, hodi halo konstrusaun moru ne’e,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here