iklan

NASIONÁL, AILEU, HEADLINE, MUNISÍPIU

SECOMS sei harii mídia lokál iha munisípiu hotu

SECOMS sei harii mídia lokál iha munisípiu hotu

Secretário de Estado para a Comunicação Social (SECOMS), Merício Juvinal dos Reis Akara, ohin, hala'o diálogu komuntáru ho komunidade sira iha Suku Seloi Craik. Imajen TATOLI/Arminda Fonseca.

AILEU, 16 fevereiru 2021 (TATOLI)—Secretário de Estado para a Comunicação Social (SECOMS), Merício Juvinal dos Reis Akara, hateten tinan ne’e SECOMS iha planu sei harii mídia lokál iha munisípiu hotu

Notísia Relevante: 2021, SECOMS sei harii Sentru Informasaun iha Suku Seloi Craik

 “Ohin, ha’u halo enkontru ida ho Adminitradór Munisípiu Aileu nian, ha’u informa katak agora daudaun ne’e ita-nia dirasaun foun ne’ebé ho naran Dirasaun Nasionál Dezenvolvimentu no Promosaun Mídia Lokál, sei iha planu harii mídia lokál iha munisípiu hotu-hotu. Objetivu no intensaun hosi mídia munisípiu (lokál) ne’e mak ita hakarak dezentraliza servisu mídia nian atu nune’e atividade sira-ne’ebé la’o iha munisípiu labele depende ba mídia nasionál,” Merício Juvinal Akara hateten ba jornalista sira iha Sede Suku Seloi Craik, tersa ne’e.

Nia hatutan, ba oin ne’e SECOMS atu dezenvolve mídia munisípiu tanba jornalista iha munisípiu mak akompaña atividade munisípiu nian hodi halo kobertura hafoin transmite ba mídia nasionál sira mak públika.

Nia dehan, mídia lokál ne’e iha tanba hakarak evita kustu boot, viajen nasionál mai munisípiu no hahú dezentraliza informasaun ba iha munisípiu sira, tanba meiu ida-ne’e hanesan kolabora hodi diversifika meiu komunikasaun munispiu nian.

“Tanba mídia estatál ne’ebé eziste ona hanesan Radiu Televizasaun Timor-Leste (RTTL), TATOLI, no Rádio Komunidade sira, ita koordena atu sira tau sira-nia ajente munisípiu no munisípiu mós bele dezenvolve aan hanesan mídia Online atu sira sai fonte informasaun ne’ebé di’ak no kredivel,” nia hateten.

Tanba ne’e, nia hateten, atu harii mídia lokál iha munisípiu sira-ne’e sei haree mós infraestrutura balun, nune’e oinsá tau planu orsamentu ba infraestrutura ninian ho objetivu atu fasilita servisu mídia sira-nian halo servisu sai efetivu liu.

Nia haktuir, bainhira harii mídia lokál mak komponente rádiu komunidade iha ona infraesrutura sei organiza hamutuk atu ezisténia rádiu komunidade no mídia nasionál, dijitál no mídia foun munisipiu nian, sira ida-idak halo sira-nai knaar.

“Rádiu halo knaar rádiu nian no televizasaun sira halo kobertura no divulga tuir televizasaun nian. Ne’ebé, ita mantein hakarak koordena servsiu hamutuk,” nia hateten.

Nia esplika, dirasaun foun mídia lokál ne’e iha departamentu rua mak hanesan sei tau atensaun ba rádiu komunidade no oinsá dezenvolvimentu mídia munisípiu nian iha meiu komunikasuan sira.

“Dirasaun foun ne’e sei hahú iha tinan ne’e no sei servisu tinan ne’e, tanba planu balun ita tenke halo preparsaun no rekursu umanu. Maibé, realístiku liu orsamentu 2022 mak ita sei tau, tanba orsamentu ne’ebé ita tau agora ne’e, ba preparasaun de’it,” Merício haktuir.

Iha fatin hanesan, Adminitradór Munisípiu Aileu, João Tilman do Rego, apresia tebes ba planu harii mídia lokál ne’e tanba sira mós durante ne’e presiza duni mídia atu rekolla atividade saida de’it mak sira hala’o iha munisípiu.

“Hu’u hanoin programa atu harii mídia lokál ne’e importante tanba dala barak ami presiza mídia sira atu halo kobertura ami-nia atividade maibé tanba jornalista hotu-hotu iha nivél nasional, dala ruma ita telfone haree mós kustu sira-ne’e hotu. Maibé, agora atu harii mídia lokál, ha’u hanoin ida-ne’e ajuda tebes atividade munisípiu nian,” nia dehan.

Jornalista: Arminda Fonseca

Editór: Cancio Ximenes

iklan
iklan

Leave a Reply

iklan
error: Content is protected !!