Koordenadora Jerál Komisaun Nasionál Prevensaun COVID-19, Odete da Silva Viegas. Imajen Tatoli/Maria Auxiliadora.

DILI, 16 fevereiru 2021 (TATOLI)—Ministériu Saúde (MS) liuhosi Komisaun Nasionál Prevensaun COVID-19 hala’o ona screening masál ba munisípiu tolu iha fronteira hanesan Bobonaro, Covalima no Rejiaun Administrativa Espesiál Oe-cusse Ambeno (RAEOA) durante loron sanulu hahú hosi 15 to’o 25 fevereiru.

Koordenadora Jerál Komisaun Nasionál Prevensaun COVID-19, Odete da Silva Viegas hateten kada Munisípiu loron ida sei foti amostra 100.

Notísia Relevante:Timoroan ida pozitivu COVID-19, kazu aumenta ba 40

“Screening masál ne’e la’ós obrigatóriu ba komunidade tanba ita halo atu deteta de’it transmisaun lokál iha fronteira,” Odete da Silva Viegas hateten ba jornalista sira iha salaun City8 Manleu, tersa (16/02).

Nia dehan, tuir loloos MS halo ona teste swab iha horisehik maibé tanba problema lojístika nune’e ekipa foin dezloka ba Munisípiu tolu iha loron 16 fevereiru dadeer hodi reforsa ekipa munisipál ba screening masál.

“Ita foin hahú halo screening masál tanba ekipa foin dezloka ohin dadeer,” nia subliña.

Antes ne’e Minsitériu Saúde halo ona sensibilizasasun no fahe ona informasaun liuliu fó advokasia ba komunidade iha Munisípiu tolu ne’e kona-bá atividade ne’e rasik.

Tanba ne’e MS iha esperansa katak, durante semana ida bele hetan amostra sufisiente atu hatene no halo detesaun karik iha duni transmisaun lokál iha fronteira ne’ebé durante ne’e sai preokupasaun públiku.

Nune’e mós Diretór Saúde Munisípiu Bobonaro, João Baptista Mau Cardoso, hateten screening masál  iha Munisipiu ne’e sei foti família ida ema na’in-rua hodi prienxe númeru ema na’in 100 kada loron iha munisípiu ida.

Nia mós deklara katak ekipa hosi munisípiu preparadu atu fó apoiu másimu ba ekipa ne’ebé mai hosi nasionál atu halo screening masál tanba  antes ne’e autoridade munisipál serbisu hamutuk ho entidade hotu hodi fó advokasia no esplika detallada kona-bá atividade ne’e.

Jornalista: Felicidade Ximenes

Editór:  Cipriano Colo

HAKEREK NO HATÁN

Please enter your comment!
Please enter your name here