Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

DILI, 16 fevereiru 2021 (TATOLI)- Komandu Polísia Munisipiu Bobonaro koopera ho ekipa Pilar III COVID-19 ba foti obrigatóriu abitante na’in-11 iha Suku Lourba, Postu Administrativu Bobonaro, Munisípiu Bobonaro hodi submete ba konfinamentu obrigatóriu ka kuarentena iha Batugade.

Portavós Komandu Jerál PNTL, Superintendente Xefe, Arnaldo de Araújo, hateten abitante na’in-11 kompostu pasajeiru, ajudante no motorista ne’e halo kontaktu direita ho pasiente COVID-19 ne’ebé halo viajen hosi Maliana ba Lourba-Bobonaro.

Notísia Relevante : Pasiente COVID-19 na’in-ida rekoperadu

Ema hirak ne’e PNTL ba foti iha sira-nia uma, Domingu (14/02),  hodi halo kedas teste swab ho rezultadu negativu, tanba sira halo kontaktu direta ho Timoroan ida ne’ebé hakat ilegál hosi Atambua-Indonézia liu fronteira Tunubibi hodi sa’e motór ojek ba Maliana no sa’e fali Angguna viajen ba Lourba iha loron 11 fevereiru 2021.

“Ema sira ne’ebé sa’e karreta hamutuk ho pasiente COVID-19 ne’ebé mai hosi Atambua, ita-nia PNTL Bobonaro no Ministériu Saúde ba foti ona sira hodi lori ona ba kuarentena Batugade,” portavós Arnaldo  de Araújo ba Agência TATOLI iha Komandu Jerál PNTL, Dili, tersa ne’e.

Arnaldo hatutan abitante ida ne’ebé tama ilegál no pozitivu COVID-19 tama tiha sala izolamentu iha Dili no  PNTL sei detein nia hodi halo prosesu investigasaun tanba haku’ur liu fronteira ho ilegálmente.

Iha parte seluk, Koordenadora Jerál Komisaun COVID-19, Odete da Silva Viegas, dehan abitante na’in-11 ne’e parte Pilar III COVID-19 halo ona teste swab ba sira.

“Abitante na’in-11 ne’e, Domingu (15/02), responsavel Pilár III informa, ema na’in-hitu ita foti ona sira nia sampel no ema na’in-lima inklui motorista  no ajudante ita asegura hotu ona sira no ohin foti ona swab sira nia rezultadu hatudu negativu, entaun ita no povu sira bele hakmatek nafatin kumpre regra,” Odete hateten.

Tuir regra, abitante hirak ne’e sei kontinua submete  iha kuarentena to’o loron 14 remata sei prolonga sira hetan iha kuarentena to’o loron 10 remata sei halo teste swab maka la deskobre sira moras bele fila ba uma.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here