Diretor Nasional Servisu Hospitalar no Emerjensia HNGV, Nilton da Silva. Imajen Tatoli/Egas Cristovão

DILI, 16 fevereiru 2021 (TATOLI)—Diresaun Nasionál Serbisu Ospitalár no Emerjénsia (DNSOE) enfrenta difikuldade atu halo tranferénsia pasiente hosi Hospitál Nasionál Guido Valadares ba estranjeiru tanba mudansa sistema administrasaun no lojístika iha periúdu COVID-19.

Diretór nasionál DNSOE, Nilton do Carmo da Silva hateten sistema administrasaun no lojístika anteriór iha mudansa boot durante surtu COVID-19 hanesan iha Ospitál tenki halo screening, halo swab, teste PCR no X-ray ba pasiente mak bele transfere ba rai-liur.

Notísia Relevante:Governu Hapara Provizóriu Tranferénsia Moras ba Rai-Li’ur

“Mudansa seluk maka tenki haruka uluk istória moras pasiente nian hosi médiku espesialista no hetan aprovasaun mak bele haruka pasiente ba rai-liur,” Nilton do Carmo da Silva hateten ba jornalista sira iha serbisu fatin, tersa (16/02).

Durante situasaun COVID-19 Ministériu Saúde tenke halo adaptasaun barak-liu tuir sistema administrasaun iha nasaun ne’ebé hakarak transfere pasiente hanesan Indonézia no Singapura.

Nia temi katak oras ne’e daudaun HNGV labele halo transferénsia ba Malázia tanba lei no task force COVID-19 iha nasaun ne’e la fó autorizasaun atu simu pasiente hosi nasaun seluk.

Mudansa administrasaun ne’ebé akontese iha Indonézia no Singapura la hanesan, médiku ne’e fó ezemplu banhira HNGV hetan ona astetadu médiku pasiente-nian tenke haruka ba doutór-sira no ekipa task force COVID-19 iha Singapura atu halo aprovasaun mak Governu TL bele halo pagamentu ba sira-nia kuarentina atu bele hetan billete ho modelu hanesan viza mak foin bele tama sira-nia nasaun.

Mudansa administrasaun hosi parte Indonézia nian, nia dehan bainhira HNGV hetan ona istória pasiente maka MS sei haruka ba Ministériu Negósiu Estranjeiru no Kooperasaun (MNEK) hodi haruka ba embaixada Indonézia nian atu diriji ba imigrasaun Indonézia nune’e bele hetan viza no lisensa.

“Prosesu ida ne’e mak durante ne’e ita halo, maibé Indonézia nian atu hetan viza prosesu kuaze fulan ida  to’o rua. Bainhira juntamédiku haruka naran mai iha parte DNSOE ami prosesa kedan,” nia subliña.

Problema kona-bá lojístika liuliu iha transporte durante periúdu COVID-19 fronteira taka no iha tinan 2021 DNSOE foin haruka pasiente dala-ida liu hosi fronteira terrestre.

Doutór Nilton hatutan, atu haruka pasiente ba Singapura mós  transporte  laiha  no durante ne’e Governu TL uza avaiun hosi World Food Programe (WFP) nian ne’ebé oferese másimu kadeira rua.

Difikuldade boot ida ne’e mak sai razaun fundamentál ba DNSOE hodi atraza pasiente barak maski hetan ona viza atu tama Singapura maibé transporte mak laiha.

Dadus hosi DNSOE hatudu katak iha tinan 2021 refere ona pasiente na’in-hitu ba Indonézia no  na’in-ida ba Singapura ho moras kankru no kurasaun.

Oras ne’e daudaun pasiente ne’ebé sei pendente na’in 38 kompostu hosi tinan 2021 hamutuk 20 no 2020 hamutuk 18 ne’ebé ho moras kurasaun no kankru.

Jornalista: Felicidade Ximenes

Editór:  Cipriano Colo

HAKEREK NO HATÁN

Please enter your comment!
Please enter your name here