Portavóz CIGC, Odete Viegas. Imajen Tatoli/Egas Cristovão

DILI, 10 maiu 2020 (TATOLI)-Governu liuhosi Ministériu Saúde durante fulan rua ona hapara provizóriu polítika transferénsia ema moras ba rai-li’ur hodi halo tratamentu saúde, relasiona ho problema pandemia globál COVID-19.

Diretóra Jerál Prestasaun Saúde atuál Portavóz Sentru Integradu Jestaun Krize (CIGC-sigla portugés), Odete Viegas da Silva, informa Ministériu Saúde la halo tranferénsia pasiente ba ospitál Sangla Bali, Indonézia,no ospitál iha Singapura tanba kazu Coronavirus afeta mós ba ospitál hirak ne’e.

”Ha’u apelu ba públiku katak taratamentu ba pasiente sira ne’ebé mak durante ne’e hala’o referál ba rai-li’ur iha Bali hanesan kankru no moras seluk tan depois kazu COVID-19 ne’e mosu iha ita-nia nasaun ita boot sira haree katak ita la haruka tan moras sira ne’e ba rai-li’ur,” dehan Odete Viegas da Silva, durante konferénsia imprensa iha CCD, domingu ohin.

Maski la halo tranferénsia moras ba estranjeiru, maibé nia afirma profisionál saúde sira konsege atende pasiente sira ho di’ak.

”Entaun grasas adeus to’o agora ita-nia pasiente sira daudaun ne’e ita nia médiku no espesialista sira hala’o tratamentu iha ne’e tanba servisu asisténsia ba ema moras sira ita hala’o nafatin,” tenik Portavóz CIGC.

Kona-ba prosesu pagamentu ba ospitál sira iha rai-li’ur maka daudaun ne’e sei atraza tanba Diresaun Nasionál Ospitalár ho adidu Timor-Leste iha Bali Indonézia sei finaliza hela dokumentu pagamentu balun iha tempu badak.

“Diresaun Nasionál Ospitalár hamutuk mós adidu iha Bali entaun dadaun ne’e sei trata hela tempu badak prosesu sira ne’e bele kompleta ona,”katak, Nia.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here