Embaixadór Xina iha Timor-Leste, Xiao Jian Guo. Imajen/Mídia MAPKOMS

LIQUIÇÁ, 16 fevereiru 2021 (TATOLI)–Embaixadór Xina iha Timor-Leste, Xiao Jian Guo, hateten Governu Xina sei kontinua ajuda Rádiu Televizaun Timor-Leste, Empreza Públika (RTTL,E.P) hodi fó apoiu tékniku liuhosi koopersaun ne’ebé Governu rua halo ona.

“Bazeia ba koopersaun parte rai rua nian, tékniku sira sei kontinua nafatin halo operasaun no manutensaun ba sistema dijitalizaun durante tinan-rua iha Timor-Leste ho operasaun tomak,” Diplomata xinéz ne’e dehan iha ámbitu lansamentu sistema dijitál transmisaun multimedia terrestre (DTMB, sigla inglés), iha suku Guiço, postu administrativu Maubara, munisípiu Liquiçá, tersa ne’e.

Embaixadór Xina nota katak durante ne’e kooperasaun entre nasaun rua hatudu laós de’it amigu, maibé fó apoiu no konfiansa mútua ba parseiru ne’ebé sinseru atu dezenvolve komunidade ida ho kultura umanidade forte.

“Loron ohin ita presiza selebra duni tanba sai hanesan sasin istória foun ida husi kooperasaun dezenvolvimentu entre Xina no Timor-Leste,” nia hatutan.

Notísia relevante: Tinan ne’e, MAPKOMS harii tan torre neen ba RTTL, E.P

Nia dehan, populasaun haree na’in 1.200 resin iha munisípiu Dili no área seluk ne’ebé besik torre transmisaun bele asesu ona televizaun ho forma dijitalizasaun ho rezolusaun a’as.

“Ida-ne’e tulun tebes rikeza moris kultura timor-oan, loke janela koñesimentu foun ba Timor-Leste atu aprende barak liután kona-ba mundu li’ur no sei bele fornese ba labarik sira atu asesu kualidade edukasaun ne’ebé di’ak,” nia hatutan.

Tuir estimasaun, programa ne’e bele kobre ba populasaun 200.000 mai kraik, iha postu administrativu Laulara, munisípiu Aileu, postu administrativu Railaco, munisípiu Ermera no posibilidade to’o ba villa antigu Ermera, postu administrativu Cailaco, munisípiu Bobonaro to’o Tunubibi inklui munisípiu Liquiçá ba postu administrativu tolu ho totál suku 78 to’o 90.

Iha biban ne’e, Embaixadór kongratula VIII Governu Konstitusional, lideradu husi Primeiru-Ministru, Taur Matan Ruak,  ne’ebé fó apoiu másimu ba kooperasaun.

Iha fatin hanesan, Ministru Asuntu Parlamentár no Komunikasaun Sosiál (MAPKOMS) Francisco Jerónimo, hateten Kooperasaun entre Xina no Timor-Leste, iha pontu ida mensiona sei prepara tékniku RTTL,E.P sira, nune’e ikus mai bele halo manutensaun materiál sira hotu ne’ebé maka oras ne’e tau iha torre sira.

“Nune’e bele halo manutensaun rasik hodi iha sustentabilidade dijitalizasaun. Xina sei ajuda ita iha tinan-rua nian laran no prepara ema tékniku RTTL,E.P atu tuir formasaun, ho nune’e kuandu ita-nia ema preparadu maka tékniku xinéz bele husik ona,” nia hatutan.

Maibé tuir governante ne’e, enkuantu seidauk halo formaasaun maka nia parte seidauk bele husik tékniku RTTL,E.P sira la’o mesak hodi jere sistema dijitalizasun ne’e.

“Ha’u maka sei halo avaliasaun, bainhira seidauk ha’u sei husu nafatin Xina atu fó nafatin apoiu no formasaun ba  ita-nia ema sira atu nune’e bele adapata didi’ak ho sistema dijitalizasaun, tanba sistema ne’e la’ós buat fásil atu monta de’it,” Ministru tenik.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here