Enkontru konsultivu ba re-vizaun rezultadu peskiza ai-han no nutrisaun Timor-Leste 2020. Imajen Tatoli/Maria Auxiliadora.

DILI, 16 fevereiru 2021 (TATOLI)—Ministériu Saúde (MS) liu hosi Departamentu Nutrisaun  halo re-vizaun ba peskiza ai-han nutrisaun ne’ebé rejista má nutrisaun aas iha Munisípiu Tolu  iha tinan 2020 mak hanesan Ermera 63.4%, Ainaro 60.3% no Rejiaun Administrativa Espesiál Oe-cusse Ambeno (RAEOA) 57.1%.

Rezultadu ne’e bazeia ba peskiza Programa Nutrisaun hosi Diresaun Nasionál Saúde Públika  ne’ebé hala’o iha fulan juñu to’o setembru 2020 no ofisialmente lansa liuhosi serimónia konsultivu iha salaun City8 Manleuana, tersa (16/02).

Notísia Relevante:Dezembru 2020, klínika Bairru-Pite rejista má nutrisaun 105

Dadus ne’e mós hatudu katak Munisípiu Aileu okupa kuartu lugár ba raes badak 53.9%, Bobonaro 50.3%,  Covalima 49.0%, Baucau 48.8%, Viqueque 48.2%, Manufahi 46.8%, Manatuto 46.7%, Liquiçá 45.8%, Lautém 42.3% no Dili 32.0%.

“Ami konvida Diretór Saúde Munisípiu sira hodi marka prezensa iha lansamentu ne’e, entaun sira hatene estadu nutrisaun iha Munisípiu sei hatudu nafatin progresu ne’ebé seidauk másimu,” Diretora Jerál Prestasaun Serbisu Saúde, Odete da Silva Viegas, ba Jornalista sira.

Doutora Odete konsidera má nutrisaun kontinua invade TL tanba kauza hosi ema-nia hahalok no falta edukasaun ba inan-aman sira atu bele hili ai-han ne’ebé di’ak ba konsumu familía loroloron-nian.

Odete fó hanoin katak, nutrisaun di’ak la depende ba ema riku no kiak maibé importante liu mak edukasaun ba aan-rasik no família hodi fornese ai-han ne’ebé diak liu ba nutrisaun família.

Antes ne’e Diresaun Nasionál Saúde Públika halo mós peskiza ba ai-han nutrisaun iha Timor-Leste iha 2013.

Peskiza ne’e hetan apoiu finanseiru hosi MS, Organizasaun Mundiál Saúde (OMS), Organizasaun Mundiál ba Fundu Emerjénsia Labrik-nian (UNICEF), Programa Ai-han Mundiál (WFP) no grupu serbisu ba nutrisaun-sira.

Notísia Relevante:Populasaun TL pursentu 47.1 sofre má nutrisaun

Jornalista: Felicidade Ximenes

Editór:  Cipriano Colo

1 KOMENTÁRIU

  1. ..nudar Timor oan senti triste komunidade munisipiu tolu hasoru Mal nutrizaun..durante tempu naruk Autoridade sira..halo saida de’it? la-halo obervasaun ba nia povo ne’ebe enfenta hamlaha..oinsa apoiu sira hodi hetan aihan nebe di’ak ba sira???Nasaun hanesan la-iha ona Autoriedade karik?tuir hau observasaun iha Dili,de’it komunidade barak susar aihan ba konsume loron ida dala tolu..so familia ka grupo oan ida de’it iha aihan barak hodi konsume la-os kosarben deit..bainhira sai Autoridade bele-menus halo buat diak ba ema hotu,ba labele haree deit uma laran..susar.

HAKEREK NO HATÁN

Please enter your comment!
Please enter your name here