Plenária Parlamento Nasionál. Imajen TATOLI/Egas Cristovão.

DILI, 15 fevereiru 2021 (TATOLI)–Komisaun A (Justisa no Konstitusionál) aprova ona proposta-lei kona-ba rejime jurídiku arbitrajen voluntária hodi altera artigu balun hosi Kódigu Prosesu Sivíl (CPC-sigla portugés) no ohin Parlamentu Nasionál sei aprovasaun iha finál globál.

Notísia Relevante: Komisaun A sei diskute proposta-lei arbitrajen voluntária ba justisa iha Aileu

“Proposta-lei rejime jurídiku ba arbitrajen voluntária no prosede alterasaun hosi Kódigu Prosesu Sivíl ami halo hotu ona iha espesialidade, ami haruka ona parlamentu no parlamentu ajenda ona atu aprova iha finál globál,” Prezidente Komisaun A (Justisa no Konstitusionál), Joaquim dos Santos, informa ba Agência TATOLI, iha varanda prinsipál Parlamentu Nasionál, segunda ne’e.

Nia haktuir, Komisaun A halo diskusaun naruk kuaze semana rua, iha Munisípiu Aileu no diskusaun ne’e la’o di’ak tebes tanba membru komisaun intendidu.

Nia dehan, proposta-lei iha artigu hamutuk 73 no artigu 73 n’e tama iha objetivu hosi lei refere.

“Iha artigu balun ke ami aprova la’ós konsensu maibé aprovasaun finál ami aprova dokumentu ne’e ho konsensu,” nia dehan.

Nia subliña, artigu hamutuk lima (5) ne’e foti sai hosi CPC hodi tau ba rejime ne’e.

Iha inisiativa lejizlativa ne’e komposta hosi artigu 5 no anexu 1. Artigu 1 (objetu) indika objetivu lei hodi halo aprovasaun ba rejime jurídiku arbitrajen voluntária.

Artigu 2 mak halo alterasaun ba 671 no 694 hosi Kódigu Prosesu Sivíl.

Artigu 3 kona-ba normativu hodi revoga artigu 679 númeru 2 no artigu 841hosi Kódigu Prosesu Sivíl.

Artigu 4 kona-ba norma tranzitória, ne’ebé determina rejime arbitrajen voluntária sei aplika ba prosesu arbitrál sira.

Artigu 5 (entraga ein-vigór), ne’ebé prevee lei bainhira públika iha Jornál Repúblika.

Purtantu proposta-lei ne’e iha anexu 1 komposta hosi kapítulu hamutuk XI.

Kapítulu I ko’alia kona-ba dispozisaun jerál, kapítulu II ko’alia kona-ba konvensaun arbitrajen, kapítulu III ko’alia kona-ba konstituisaun tribunál arbitrál, kapítulu IV ko’alia kona-ba rekizitu, devér, responsabilidade no direitu árbitru sira.

Nune’e mós kapítulu V ko’alia kona-ba kompeténsia tribunál arbitrál, kapítulu VI ko’alia kona-ba medida provizória no orden preliminár sira.

Artigu VII ko’alia kona-ba inísiu, kondusaun no dezenvolvimentu iha prosesu arbitrál, kapítulu VIII ko’alia kona-ba sentensa arbitrál no prosesu ikus.

Kapítulu IX ko’alia kona-ba impugnasaun sentensa arbitrál iha tribunál judisiál, kapítulu X ko’alia kona-ba ezekusaun sentensa arbitrál nasionál nasionál hosi tribunál judisiál no kapítulu XI sita konfirmasaun no ezekusaun sentensa arbitrál estranjeira.

Tuir ajenda ne’ebé iha, ohin, Parlamentu Nasionál sei aprova proposta-lei ne’e iha finál globál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here