Prezidente Komisaun A PN, Joaquim dos Santos. Imagen Antonio Goncalves.

DILI, 28 janeiru 2021 (TATOLI)–Komisaun A (Justisa no Konstitusionál) iha Parlamentu Nasionál sei kontinua diskute proposta-lei arbitrajen provizória iha munisípiu Aileu.

Notísia Relevante: PN aprova proposta-lei rejime jurídiku ba arbitrajen iha jeneralidade

Iha loron 26 janeiru 2021 liubá, Parlamentu Nasionál (PN) aprova ona iha faze jeneralidade kona-ba proposta-lei rejime jurídiku ba arbitrajen voluntáriu hodi halo alterasaun ba artigu balun iha Kódigu Prosesu Sivíl (CPC-sigla portugés).

Proposta-lei ne’e ho Númeru 11/V (2ª) ne’e aprovada ho rezultadu votasaun a-favór 57 no abstensaun 2.

“Ami sei kontinua diskute iha faze espesialidade nian iha munisípiu Aileu, Aisirimou, hahú hosi loron 03 fevereiru to’o sei ramata iha loron 06 fevereiru,” Prezidente Komisaun A, Deputadu Joaquim dos Santos, informa ba jornalista sira iha resintu PN, kinta ne,e.

Razaun Komisaun A debate iha Aileu hodi fó konsentrasaun ho másimu.

Deputadu Joaquim dos Santos “Boraluli” fundamenta iha relatóriu no paresér, atu altera artigu balun iha CPC atu Timor-Leste harii rejime rasik, nune’e Governu husu ba parlamentu atu aprova rejime jurídiku ne’e ho urjénsia.

“Ne’e signifika bainhira iha disputa ruma, liuliu disputa komersiál. Bainhira ema sira-ne’ebé halo disputa ne’e iha marjen atu hili sira-nia árbitru rasik, arbitru ne’e sira hili hosi juis sira hosi rai-laran ka bele mós juiz sira hosu rai-li’ur maibé ita tenke harii sentru ba arbitrajen, hodi fó solusaun ba sira-nia problema,” nia esplika.

Nia hatutan, bainhira parte rua ne’ebé involve iha disputa la konkorda, bele rekorre ba tribunál judisiáriu hodi halo anulasaun.

Nia dehan, proposta-rezolusaun konkluzaun mak parte rua iha kazu disputa ruma eskolla sé mak bele tesi-lia.

“Disputa ne’e la’os rai-laran de’it maibé bele mós rai-li’ur hanesan kompañia rai-li’ur ho rai laran, kompañia rai laran ka rai-li’ur ho estadu. Rejime atu kria kondisaun rezolve problema disputa sira,” nia hateten. 

Nia hatutan, durante ne’e Timor-Leste la konsege rezolve disputa komersiál sira tanba laiha instrumentu sentru arbitrajen voluntária ne’e.

Nia fó ezemplu, bainhira arbitru sira iha estranjeiru mak rezolve maibé parte ida la konkorda bele rekore ba tribunál Timor nian hodi halo anulasaun.

Iha proposta-lei ne’e husu atu halo alterasaun ba artigu 841, artigu 679 númeru 2 no halo redasaun foun ba
artigu 67. Ho alterasaun artigu balun iha CPC sei armoniza diploma foun kona-ba arbitrajen.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here