Ministru Koordenadór Asuntu Ekonómiku, Joaquim Amaral no ekipa halo vizita ba fábrika bee Gota, iha Aimutin, sesta (12/02). Imajen TATOLI/Florêncio Miranda Ximenes

DILI, 12 fevereiru 2021 (TATOLI)Ministru Koordenadór Asuntu Ekonómiku (MKAE), Joaquim Amaral, no ekipa halo vizita ba fatin produsaun bee Gota no nota katak bee ne’ebé prodús iha kualidade no prenxe rekezitu saúde hodi bele sai konsumu nasionál.

“Ami haree prosesamentu produtu Gota sai produtu nasionál ne’ebé prenxe rekezitu estandar tuir lei no materiál ne’ebé kontein iha bee laran hatudu duni produtu iha kualidade no tuir regra Organizasaun Saúde Mundiál,” Ministru Joaquim informa bainhira vizita fábrika empreza Gota iha Aimutin, sesta ne’e.

Tuir governante ne’e, gota hanesan produtu nasionál ne’ebé la lakon ho bee importadu sira, nune’e Governu sei serbisu atu apoiu ho kondisaun, hodi kompañia nasionál sira bele hetan fatin.

Aleinde ne’e, Governu iha polítika ba rekuperesaun ekonómika tanba setór privadu mak sai parseiru di’ak ba dezenvolvimentu ekonómiku iha Timor-Leste.

“Governu hakarak aprosima atividade sira ne’e tanba di’ak tebes atu ita-nia produtu ne’e bele hetan fatin boot liu iha merkadu nasionál atu redús bee importadu sira,” nia akresenta.

Notísia relevante: SEA disemina dekretu-lei eliminasaun saku plástiku ba empreza Gota-distributór

Nune’e, Ministru husu ba konsumidór timor-oan tomak atu labele dúvida konsumu produtu Gota tanba iha kualidade no liu ona teste laboratóriu.

Nia dehan, Governu apresia haree progresu produsaun no hein katak investimentu indústria bele inspira timor-oan ka autór ekonómiku seluk atu investe no esplora pontensialidade seluk atubele setór privadu hetan fatin iha nia rai rasik.

Ministru esplika, kona-ba komprimentu dekretu-lei númeru 37/2020, eliminasaun no importasaum saku plástiku, uzu úniku, embalajen no objetu husi materiál plástiku, ne’ebé ninia kontiúdu bandu importasaun bee, tanba Timor-Leste opta regra merkadu livre, maka la autoriza Governu bandu importasaun, maibé bele hasa’e produsaun ho kualidade iha rai laran inklui kontribui importasaun.

Iha biban hanesan, Prezidente  empreza Esperansa Timor-oan (ETO) no Gota, Nilton Telmo dos Santos, agradese Governu liuhosi MKAE tanba bele vizita fábrika hodi fó motivasaun atu halo atividade ekonómiku iha país laran.

“Investimentu hirak ne’e ami halo atubele kontribui ba dezenvolvimentu ekonómiku iha rai laran no loke kampu traballu hodi hamenus dezempregu iha Timor-leste,”  nia akresenta.

Nune’e, Prezidente empreza ne’e agradese tanba bele hetan konfiansa no motivasaun atu kontinua investimentu no sente empreza la la’o mesak.

“Ami buka hadi’a beibeik kualidade serbisu ne’ebé iha atubele presta produtu ida ho kualidade iha ita-nia sosiedade nia leet. Ami haree iha kualidade superiór liu kompara ho produtu balun ne’ebé mai husi rai-li’ur,” nia hatutan.

Gota mós presiza konvense sosiedade atubele konsumu produtu bee iha rai-laran tanba produtu ne’e hodi haburas ekonomia rai-laran.

“Ami agradese populasaun ne’ebé fó ona konfiansa hodi konsumu produtu Gota no ami kontinua nakloke ba krítika hodi kontinua hadi’a kualidade,” nia kompromete.

Maski nune’e, Gota sei kontinua esforsu atu halo produsaun bee hodi bele sirkula iha territóriu nasionál.

Traballadór ne’ebé serbisu iha fábrika GOTA kompostu hamutuk 70 no tuir oráriu kada semana halo produsaun dala-rua, ne’ebé kada oras ida prodús botir hamutuk 12.000.

Ministru Joaquim halo vizita ba fábrika Gota akompaña husi Diretór Ezekutivu Servisu ba Rejistu no Verifikasaun Emprezariál (SERVE) Autoridade Inspesaun no Fiskalizasaun Atividade Ekonómika, Sanitária no Alimentasaun (AIFAESA), no Autoridade Aduaneira (AA)/Alfándega.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here