SEA halo diálogu ho empreza Gota no diatributór, kona-ba dekretu-lei eliminasaun plástiku, iha Otél D’city, Mandarin, tersa (19/01). Imajen TATOLI/Florêncio Miranda Ximenes

DILI, 19 janeiru 2020 (TATOLI)—Governu liuhosi Sekretaria Estadu Ambiente (SEA) halo diseminasaun dekretu-lei númeru 37/2020 kona-ba eliminasaun no importasaum saku plástiku, uzu úniku, embalajen no objetu hosi materiál plástiku, ba empreza prodús bee, Gota.

Dekretu-lei ne’e promulga ona hosi Prezidente Repúblika, Francisco Guterres ‘Lú Olo’ iha loron 23 setembru 2020 no iha 23 janeiru 2021 entrada ein vigór.

“Ami halo diálogu ho empreza Gota, ETO ne’ebé prodús bee no empreza sira ne’ebé halo distribusaun Gota iha Timór, tanba ita hatene empreza ne’e asosiadu ho plástiku,” Sekretáriu Estadu Ambiente, Demétrio do Amaral de Carvalho, hateten hafoin diálogu ho empreza produtór Gota iha Otél D’city, Mandarin, tersa ne’e.

Notísia relevante: SEA alerta, 23 janeiru 2021 labele uza plástiku iha loja

Iha diálogu ne’e, Sekretáriu Estadu Demétrio rona situasaun loloos ne’ebé empreza nasionál ne’e hasoru no aprezenta mós medida atu labele hamosu pániku iha dezenvolvimentu ekonomia rai-laran.

Governu liuhosi SEA hakarak implementa polítika di’ak atu hamenus risku ba dezenvolvimentu ekonomia, liuliu kriasaun kampu traballu.

“Ita haree ho kuidadu no halo kálkulu ho rasionál, nune’e iha implementasaun polítika zero plástiku ne’e bele la’o graduadu tuir kontestu Timor-Leste nian,” nia akresenta.

Lejizlasaun ne’e mensiona lista sira ne’ebé presiza kombate iha loron 23 janeiru tinan ne’e hanesan embalajen plástiku no hapara importasaun bee hemu ho kuantidade mili litru 500 (aqua gelas) atubele salva guarda ambiente.

“Dekretu-lei ne’e iha flesibilidade atu ita haree oinsá posibilidade kombate plástiku, maibé iha sorin seluk ita bele dezenvolve estratéjia atu negósiu sira ne’ebé asosiadu ho plástiku kontinua verde ba futuru,” nia hatutan.

SEA foku kombate uluk uzu embalajen, liuliu plástiku taskar tanba kama’an, ne’ebé la’ós bee de’it mak bele lori maibé anin mós bele lori hodi estraga ambiente no embalajen sira ne’ebé kontein iha produtu sira.

Nune’e, iha tempu besik hasai lista difinitiva ba emblajen plástiku, hafoin halo mapamentu ba estoke plástiku sira tanba empreza sira importa sasán ho duransaun fulan-neen.

SEA mós deside taka ona empreza ne’ebé prodús taskar iha Timor-Leste tanba fó risku boot ba ambiente.

Iha biban hanesan, Prezidente empreza Esperansa Timor-oan (ETO) no Gota, Nilton Telmo Gusmão dos Santos, prontu kumpre dekretu-lei, maski hamosu pániku ba setór privadu tanba maioria produtu ne’ebé sirkula iha merkadu ho emblajen plástiku.

“Ha’u ho inisiativa husu halo diskusaun atu Governu disemina inklui haree hamutuk polítika atu implementa lejizlasaun ne’e labele fó efeitu ba atividade ekonómika ne’ebé eziste iha ita-nia rai,” nia tenik.

Prezidente empreza nasionál ne’e, prontu koopera no kumpre dekretu-lei, maibé presiza tempu atubele implementa tanba presiza buka matéria prima atu subtitui, liuliu prodús embalajen ne’ebé amigável ho ambiente.

“Ami prontu no ami buka peskiza oinsá substitui plástiku ne’ebé ita uza daudaun ne’e, ho produtu ne’ebé di’ak ba ita -nia rai,” nia akresenta.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here